شىمكەنت قالاسى اكىمىنىڭ تاپسىرماسىنا سايكەس، ەرعالي بىلىسبەكوۆ كۇردەلى جوندەۋدەن ءوتىپ جاتقان ۇيلەردى ارالاپ، تۇرعىندارىمەن كەزدەستى.

اكىم ورىنباسارى ەڭ الدىمەن «كۇنشىعىس» شاعىن اۋدانىنداعى №21 ءۇيدىڭ كۇردەلى جوندەۋ جۇمىستارىمەن تانىستى. شيرەك عاسىردان استام ۋاقىت جوندەۋ جۇمىستارى جۇرگىزىلمەگەن 60 پاتەرلى تۇرعىن ءۇي بۇگىندە تولىعىمەن قايتا جاڭعىرتىلىپ وتىر.

ءۇي ءتورايىمى جاميليا دوسبولوۆانىڭ بۇل ۇيدە تۇرعانىنا 14 جىل بولعان. سوڭعى كەزدەرى شاتىردان جاڭبىر ءوتىپ، ابدەن ابىگەرگە تۇسكەندەرىن ايتادى. وزەكتى ماسەلەنىڭ شەشىمى تابىلىپ، توزىعى جەتكەن تۇرعىن ءۇيدىڭ قايتا جاڭعىرعانىنا قۋانىشتى.

ە.بىلىسبەكوۆ №17 ءۇيدىڭ دە جۇمىس ساپاسىن باقىلادى. تۇرعىندارى ءبىراۋىزدان ورتاق شەشىم قابىلداپ، كۇردەلى جوندەۋ جۇمىستارىنا كەلىسىم بەرگەن. ناتيجەسىندە جەرگىلىكتى بيۋدجەت ەسەبىنەن قاراجات ءبولىنىپ، كۇردەلى جوندەۋ جۇمىستارى قايتارىمدى نەگىزدە جۇرگىزىلۋدە.

بيىل قالادا «نۇرلى جەر» باعدارلاماسى اياسىندا 25 كوپپاتەرلى تۇرعىن ۇيگە كۇردەلى جوندەۋ جۇمىسىن جۇرگىزۋ جوسپارلانعان. ناتيجەسىندە ەسكىرگەن ۇيلەردىڭ شاتىرى مەن ينجەرنەرلىك كوممۋنيكاسيا جۇيەلەرى جاڭارتىلىپ، جەرتولەلەرى قايتا جوندەلۋدە.

تۇرعىن ءۇي قورىن ساقتاۋ جانە تيىسىنشە پايدالانۋ شارالارىنا سايكەس، قالادا كوممۋنالدىق تۇرعىن ءۇي قورىنداعى 11 كوپقاباتتى تۇرعىن ۇيگە اعىمداعى جوندەۋ جۇمىستارىن دا جۇرگىزۋ قاراستىرىلعان. جوندەۋ جۇمىستارىن تاياۋدا تولىعىمەن اياقتاۋ جوسپارلانۋدا.