البەرت ەينشتەيننىڭ سالىستىرمالى تەوريانى جازعان كەزدەگى ەسەپتەۋلەرى بار قولجازبا اۋكسيوندا 11 ميلليون ەۋروعا ساتىلدى.
پاريجدەگى "Christie's" اۋكسيون ۇيىندەگى ساۋدا قولتاڭبا قويىلعان عىلىمي قۇجات رەكوردىن جاڭارتتى.
بۇل تەوريالىق فيزيكتىڭ ۇلى عىلىمي جۇمىسىن كورسەتەتىن ەكى ماقالانىڭ ءبىرى.
1915 جىلى جاريالانعان تەوريا ادامزاتتىڭ كەڭىستىك، ۋاقىت جانە گراۆيتاسيا تۋرالى تۇسىنىگىن وزگەرتتى.
ەسەپتەردىڭ قولجازباسىن 1913-1914 جىلدار ارالىعىندا ەينشتەين مەن قۇجاتتى ساقتاعان شۆەيساريالىق ارىپتەسى ميشەل بەسسو جازعان.
"Christie's" اۋكسيون ءۇيى بەسسونىڭ بولاشاقتى ويلاپ، تاريحي ماڭىزدى قولجازبانى ساقتاعانىن جوعارى باعالادى.
اۋكسيون ءۇيىنىڭ ساراپشىسى ۆينسەنت بەللوي "ەينشتەين – وتە از جازبالار ساقتاعان ادام، سوندىقتان قولجازبانىڭ امان قالعانى جانە بىزگە جەتكەنى ەرەكشە باعالى" دەدى.
قاعازداردا قارا سيالى قالاممەن جازىلعان ەسەپتەر بار. بەللوي مىرزانىڭ ايتۋىنشا، تاريحي قولجازبادا تەوريانى تۇجىرىمداۋ جولىنداعى ءبىرقاتار قاتەلەر دە بار.
"Christie's" بۇل ساتىلىم "دۇنيە ءجۇزىنىڭ تۇكپىر-تۇكپىرىندەگى كوللەكسيونەرلەردى باۋرادى" دەدى.
الايدا 54 بەتتىك قاعازدى ساتىپ الۋشى انىقتالعان جوق.
ەينشتەيننىڭ سالىستىرمالى تەورياسى عالامنىڭ، پلانەتالىق وربيتالاردىڭ جانە قارا قۇردىمداردىڭ پايدا بولۋىن تۇسىنۋگە كومەگىن تيگىزگەن.
وتكەن مامىردا ەينشتەين تەورياسىنىڭ ەڭ ايگىلى E=mc² تەڭدەۋى بار حات 1،2 ميلليون دوللاردان ارتىق باعاعا ساتىلدى.
