شىمكەنت قالاسىنىڭ اۋىل شارۋاشىلىعى جانە ۆەتەريناريا باسقارماسى جانە قالالىق كاسىپكەرلەر پالاتاسىنىڭ ۇيىمداستىرۋىمەن «ىسكەر قالا» باعدارلاماسى مەن اوك مەملەكەتتىك قولداۋ شارالارىن ءتۇسىندىرۋ بويىنشا سەمينار ءوتتى.

سەميناردا قالا شەگىندە باقشا قۇلپىنايىنىڭ (Fragaria x ananassa) ينتەگراسيالانعان ءوندىرىسىنىڭ «يننوۆاسيالىق ادىستەرى» جوباسى پراكتيكالىق نەگىزدە كورسەتىلدى.

بۇل جوبا قالا حالقىن قۇلپىناي ونىمدەرىمەن قامتاماسىز ەتىپ، ءۇي ىرگەلىك جەرلەردى يگەرىپ، قالا حالقىنىڭ تابىسىن ارتتىرۋ ماقساتىندا قولعا الىندى.

بيىل العاش رەت 0،5 گا جەرگە عىلىم مەن تەحنيكالىق جەتىستىكتەردى قولدانۋ ارقىلى «البا» جانە «كليري» سۇرىپتارى ەگىلگەن. قازىرگى ۋاقىتتا قۇلپىناي ونىمدەرىنىڭ 70-90% جەكە قوسالقى شارۋاشىلىقتاردا ەگىلەدى. الايدا، زاماناۋي تەحنولوگيالاردى قولدانۋ مۇمكىن بولماۋىنا بايلانىستى ونىمدىلىك تومەن جانە تەك ماۋسىم ارالىق مەرزىمدە عانا وسىرىلەدى. قازاقستان بويىنشا قۇلپىناي بيزنەسى دامىماعان. نارىقتا نەگىزىنەن تۇركيادان اكەلىنەتىن يمپورتتىق قۇلپىنايلار ساۋدا سورەلەرىنەن تابىلادى.

ماماندار قازىرگى ۋاقىتتا جيدەك داقىلدارىنىڭ، ونىڭ ىشىندە باقشا قۇلپىنايىنىڭ اسسورتيمەنتىن كەڭەيتۋ جانە ونىمدىلىگىن ارتتىرۋ پروبلەماسى وتە وتكىر ەكەنىن ايتادى. سوندىقتان وسى جوبانى جۇزەگە اسىرۋ ارقىلى قالا حالقىن وتاندىق ونىممەن قامتۋ مۇمكىندىگى ارتپاق. جوبا ناتيجەلەرى قالاداعى فەرمەرلىك شارۋاشىلىقتاردا ەنگىزىلەتىن بولادى.