پاريج قالاسىندا وتكەن يۋنەسكو-نىڭ 41ء-شى باس كونفەرەنسياسىنىڭ ارنايى شەشىمىمەن 2022-2023 جىلدارعا ارنالعان حالىقارالىق مەرەيتويلار ءتىزىمى قابىلدانىپ، وعان قازاقستاننىڭ ۇسىنىسىمەن ءتىلتانۋشى، ادەبيەتشى احمەت بايتۇرسىن ۇلىنىڭ 150 جىلدىعى جانە ءانشى روزا باعلانوۆانىڭ 100 جىلدىعى ەندى.
قازاقستاننىڭ فرانسياداعى ەلشىسى جانە يۋنەسكو جانىنداعى تۇراقتى وكىلى جان عالييەۆ باس كونفەرەنسياعا ۇسىنىستارىمىزدى قولداعانى ءۇشىن العىس ءبىلدىرىپ، مۇشە مەملەكەتتەردى جانە ۇيىم حاتشىلىعىن اتالعان مەرەيتويلار اياسىندا ەلىمىزدە جانە شەتەلدە وتكىزىلۋى جوسپارلانىپ وتىرعان ءىس-شارالارعا قاتىسۋعا شاقىردى.
جالپى، 2022-2023 جىلدارعا ارنالعان تىزىمگە ۇيىمعا مۇشە مەملەكەتتەر ۇسىنعان 67 مەرەيتوي كىردى.
بۇدان باسقا، باس كونفەرەنسيا اياسىندا جاسىرىن داۋىس بەرۋ ناتيجەلەرى بويىنشا قازاقستان 2021-2025 جىلدار كەزەڭىنە يۋنەسكو-نىڭ ەكى سۋبسيديارلىق ورگاندارىنىڭ، اتاپ ايتقاندا، حالىقارالىق گيدرولوگيالىق باعدارلامانىڭ (حگب) جانە كوممۋنيكاسيانى دامىتۋدىڭ حالىقارالىق باعدارلاماسىنىڭ (حبۇك) ۇكىمەتارالىق كەڭەستىرىنىڭ قۇرامىنا سايلاندى. يۋنەسكو-عا مۇشە مەملەكەتتەر قازاقستانعا بىلدىرگەن سەنىمى ەلىمىزدىڭ ۇيىم قىزمەتىنە قوسىپ جۇرگەن مازمۇندى ۇلەسىن تانۋ بولىپ تابىلادى.
ءبىرتۋار تۇلعا احمەت بايتۇرسىن ۇلى جايىندا "قازاقستان" تەلەارناسى تۇسىرگەن "احمەت. ۇلت ۇستازى" تۋىندىسى جاقىن ارادا كورەرمەنگە جول تارتپاق.
پىكىر قالدىرۋ