G7 دەنساۋلىق ساقتاۋ مينيسترلەرى دۇيسەنبىدە كوۆيدتىڭ جاڭا "Omicron" نۇسقاسىنىڭ بۇكىل الەمگە تارالۋىنا بايلانىستى شەكارانى جابۋعا ماجبۇرلەۋ شارالارى جايىندا شۇعىل جينالىس وتكىزەدى. ساراپشىلار جاڭا شتاممنان تۋىندايتىن ءقاۋىپ دەڭگەيىن انىقتاۋ ءۇشىن تالقى وتكىزبەك.

كەزدەسۋدى G7 ءتوراعاسى ۇلىبريتانيا كوتەردى. ۇلىبريتانيا مۋتاسيانىڭ جاڭا نۇسقاسى انىقتالعان ەلدەردىڭ قاتارىندا.

دۇيسەنبىدە جاپونيانىڭ پرەمەر-مينيسترى فۋميو كيشيدا "ءبىز داعدارىسقا قارسى شارالاردى قولدانىپ جاتىرمىز" دەپ مالىمدەدى جانە جاڭا نۇسقاعا بايلانىستى بارلىق شەتەلدىكتەر جاپونياعا كىرۋىنە تىيىم سالاتىنىن ايتتى. تىيىم سەيسەنبىدە كۇشىنە ەنەدى.

جاپونيادا حالىقتىڭ 76%-دان استامى تولىعىمەن ەكپە العان. كيشيدا كەلەسى ايدان باستاپ ۆاكسيناسيالاۋدى كۇشەيتەتىنىن مالىمدەدى. ونىڭ سوزىنشە، بۇل جوسپار ەگدە جاستاعى ادامدار مەن مەديسينا قىزمەتكەرلەرىنەن باستاپ، بارلىق ادامدارعا باعىتتالادى.

كوۆيدتىڭ "Omicron" شتاممى العاش رەت وڭتۇستىك افريكادا تىركەلدى. جاپونيا بارلىق شەتەلدىك ازاماتتاردىڭ ەلگە كىرۋىنە تىيىم سالعان يزرايلدەن كەيىنگى ەكىنشى ەل. اقش، ۇلىبريتانيا، برازيليا جانە كانادا سياقتى ەلدەر دە ساياحاتقا شەكتەۋ ەنگىزدى.

شتامم وسى ۋاقىتقا دەيىن ەۋروپا، افريكا، امەريكا جانە ازيانىڭ وننان استام ەلىندە انىقتالعان.