جۇڭگو 2022 جىلى بەيجىڭدە وتەتىن قىسقى وليمپيادا ويىندارىنا اقش-تىڭ جوسپارلانعان ديپلوماتيالىق بويكوتىن ايىپتاپ، وعان جاۋاپ قايتاراتىنىن مالىمدەدى.
جۇڭگو سىرتقى ىستەر مينيسترلىگىنىڭ باسپا ءسوز حاتشىسى چجاو ليسزيان جۇڭگو "قاتاڭ قارسى شارالار" قابىلدايتىنىن ايتتى.
دۇيسەنبىدە اقش قىتايداعى ادام قۇقىقتارىنا قاتىستى الاڭداۋشىلىققا بايلانىستى بەيجىڭگە ديپلوماتتارىن جىبەرمەيتىنىن مالىمدەگەن.
چجاو اقش سپورتشىلارى ويىندارعا بارا الاتىنىن جانە ولارعا تولىقتاي مەملەكەتتىك قولداۋ كورسەتىلەتىنىن ايتتى.
سەيسەنبى كۇنى ب ا ق بريفينگىندە چجاو اقش-تى "سپورتتاعى ساياسي بەيتاراپتىقتى" بۇزدى دەپ ايىپتاپ، ۇسىنىلعان بويكوت "وتىرىك پەن قاۋەسەتتەرگە نەگىزدەلگەن" دەدى.
بۇل جاعداي ەكى ەل اراسىندا شيەلەنىس كۇشەيگەنىنىڭ تاعى كورىنىسى. اقش قىتايدى شىڭجاڭداعى قازاق، ۇيعىر سياقتى ازشىلىقتى قۋعىن-سۇرگىنگە ۇشىراتىپ، گەنوسيد جاسادى دەپ ايىپتايدى. ال جۇڭگو بۇل ايىپتاۋدى ۇزىلدى-كەسىلدى جوققا شىعارىپ ءجۇر.
وليمپيادا ويىندارىنا ادەتتە اقش پەن باسقا ەلدەردىڭ جوعارى دەڭگەيدەگى ۇكىمەت وكىلدەرى قاتىسادى. وسى جىلدىڭ باسىندا اقش ءبىرىنشى حانىمى دجيل بايدەن توكيودا وتكەن جازعى وليمپيادادا اقش دەلەگاسياسىن باسقارعان.
ءبىراق دۇيسەنبىدە اق ءۇيدىڭ باسپا ءسوز حاتشىسى دجەن پساكي اقش بەيجىڭدە وتەتىن وليمپيادادا ولاي ىستەمەيتىنىن ايتتى. ول 2022 جىلعى ويىندارعا رەسمي دەلەگاسيانى جىبەرمەۋ ارقىلى بەيجىڭگە "ناقتى مەسسەدجدى" ۇعىندىرۋعا تىرىسادى.
قىتايدىڭ Weibo الەۋمەتتىك مەديا پلاتفورماسىندا سەيسەنبى كۇنى تاڭەرتەڭ "اقش-تىڭ بەيجىڭدەگى قىسقى وليمپياداعا ديپلوماتيالىق بويكوت جاريالاۋى" دەگەن ءسوز بويىنشا ىزدەۋ تاقىرىبىنا سەنزۋراعا سالىندى.
BBC اقپاراتىنشا، جۇڭگو مەملەكەتتىك "Global Times" باسىلىمى جاريالاعان حابارلامانىڭ استىنداعى پىكىرلەردىڭ كوپشىلىگى دە جويىلىپ، 1500-گە جۋىق پىكىردىڭ تەك سەگىزى عانا قالعان.
بۇعان دەيىن ۆاشينگتون بەيجىڭ وليميپياداسىنا بويكوت جاريالاعانى حابارلاندى.
ال ونىڭ الدىندا اقش پرەزيدەنتى دجو بايدەن الدىڭعى ايدا قىتايدا وتەتىن سپورت ويىندارىنا بويكوت جاريالاۋ جوسپارى بار ەكەنىن مالىمدەگەن.
حالىقارالىق ۇيىمدار جانە كوپتەگەن دەموكراتيالىق ەلدەر قىتايدى "شىڭجاڭ اۆتونومياسىندا تۇراتىن ۇيعىر، قازاق سياقتى مۇسىلمان ازشىلىقتارىنا گەنوسيد جاسادى" دەپ ايىپتايدى.
سونىمەن قاتار، بەيجىڭنىڭ گونكونگتاعى ساياسي بوستاندىقتاردى باسىپ-جانشۋ ارەكەتىنە قاتىستى دا شيەلەنىس كۇشەيدى.
پىكىر قالدىرۋ