دەنساۋلىق ساقتاۋ ءمينيسترى الەكسەي سوي كوروناۆيرۋستىڭ تارالۋى ءالى توقتاماعانىن ەسكە سالىپ، جاڭا جىلدى تويلاۋعا قاتىستى قازاقستاندىقتارعا كەڭەس بەردى.
ءمينيستردىڭ ايتۋىنشا، جاڭا جىلدىق مەرەكەنى وتباسىمەن بىرگە ۇيدە قارسى العان دۇرىس.
– ءبىز وتباسىمەن بىرگە قارسى الۋعا كەڭەس بەرەر ەدىك. جاڭا جىل – بۇل وتباسىلىق مەرەكە، سول سەبەپتى ادامدار سانىن بارىنشا شەكتەۋگە تىرىسۋ كەرەك. ۆيرۋس ەشقايدا كەتكەن جوق. وكىنىشكە قاراي، تارالىپ جاتىر، اۋرۋ جۇقتىرعاندار مەن قايتىس بولعاندار بار. سوندىقتان ءوزىڭىزدى ساقتاپ، وتباسىڭىزبەن كوبىرەك ۋاقىت وتكىزگەن ءجون، – دەدى سوي.
سونىمەن قاتار، ول كورپوراتيۆتەر مەن باسقا دا اۋقىمدى ءىس-شارالارعا بارماۋعا كەڭەس بەردى.
– ءقازىر بەلگىلى ءبىر تالاپتار بار. جالپى ءبىز اراقاشىقتىق ساقتاۋعا بولاتىن كەيبىر كونفەرەنسيالاردى قوسپاعاندا، ءىرى ءىس-شارالار وتكىزبەيمىز. ياعني، دەنساۋلىق ساقتاۋ مينيسترلىگىندە (جاڭا جىلدىق كەشتەر - رەد) بولمايدى، – دەدى دەنساۋلىق ساقتاۋ ءمينيسترى الەكسەي سوي.
بۇعان دەيىن مينيستر "وميكرون" شتامىنا بايلانىستى قازاقستاندا شەكتەۋ شارالارى ەنگىزىلۋى مۇمكىن ەكەنىن ايتقان ەدى.
پىكىر قالدىرۋ