جۇڭگو اقش شەنەۋنىكتەرىنە سانكسيا جاريالادى. بۇعان دەيىن بەيجىڭنىڭ شىڭجاڭداعى قازاق، ۇيعىر سياقتى ازشىلىقتارعا جۇرگىزگەن ساياساتىنا قارسى ۆاشينگتون سانكسيالار جاريالاعان. كوپ وتپەي اقش-تىڭ ءدىني بوستاندىقتى باقىلايتىن ۇكىمەتتىك كوميسسياسىنىڭ ءتورت مۇشەسىنە بەيجىڭ سانكسيا جاريالادى.
سەيسەنبى كۇنگى كەزەكتى باسپا ءسوز ءماسليحاتىندا سويلەگەن سوزىندە جۇڭگو سىرتقى ىستەر مينيسترلىگىنىڭ رەسمي وكىلى چجاو ليسزيان امەريكا قۇراما شتاتتارىنىڭ حالىقارالىق ءدىني بوستاندىق جونىندەگى كوميسسياسىنىڭ ءتورايىمى نادين ماەنزا، ءتوراعا ورىنباسارى نۋري تۋركەل جانە كوميسسيا مۇشەلەرى انۋريما بحارگاۆا مەن دجەيمس كاررگە سانكسيا سالىنعانىن مالىمدەدى.
كوميسسيا قۇراما شتاتتاردان تىس جەرلەردە ءدىني سەنىم بوستاندىعىن باقىلايدى جانە اقش پرەزيدەنتىنە، مەملەكەتتىك حاتشىسىنا جانە كونگرەسسكە ساياسي ۇسىنىستار جاسايدى.
تاياۋدا اقش سەناتى قىتايدىڭ شىڭجاڭ ايماعىنان كەلەتىن يمپورتقا تىيىم سالۋ تۋرالى زاڭ جوباسىن قابىلداعان. بۇل – "بەيجىڭنىڭ شىڭجاڭداعى ۇيعىر، قازاق سياقتى مۇسىلمان ازشىلىعىنا جاساعان قاتال ساياساتىنا قارسى ۆاشينگتوننىڭ جاۋابى" دەپ سانالدى.
سونىمەن قاتار، اقش، اۆستراليا، ۇلىبريتانيا جانە كانادا بەيجىڭ قىسقى وليمپيادا ويىندارىنا ديپلوماتيالىق بويكوت جاريالاپ، ءوز مينيسترلەرىن جىبەرمەيتىنىن مالىمدەگەن.
اقش پرەزيدەنتى دجو بايدەن الدىڭعى ايدا بەيجىڭ وليمپيادالىق سپورت ويىندارىنا بويكوت جاريالاۋ جوسپارى بار ەكەنىن مالىمدەگەن. كەيىنىرەك اقش بەيجىڭ وليميپياداسىنا بويكوت جاريالاعان العاشقى ەل اتاندى.
ۆاشينگتوننىڭ بۇل ارەكەتىنەن كوپ وتپەي بەيجىڭ اقش-تى ايىپتادى.
كەيىنىرەك BBC "بەيجىڭ-2022 بويكوتىنىڭ قانشالىقتى ماڭىزى بار" ەكەندىگى تۋرالى ساراپتاما ماقالا جاريالادى.
حالىقارالىق ۇيىمدار جانە كوپتەگەن دەموكراتيالىق ەلدەر قىتايدى "شىڭجاڭ اۆتونومياسىندا تۇراتىن ۇيعىر، قازاق سياقتى مۇسىلمان ازشىلىقتارىنا گەنوسيد جاسادى" دەپ ايىپتايدى.
سونىمەن قاتار، بەيجىڭنىڭ گونكونگتاعى ساياسي بوستاندىقتاردى باسىپ-جانشۋ ارەكەتىنە قاتىستى دا شيەلەنىس كۇشەيە ءتۇستى.
پىكىر قالدىرۋ