– ۇلكەن كەنتى ەڭ ىڭعايلى جەر، ۇلتتىق ەلەكتر جەلىلەر توپوگرافياسى تۇرعىسىنان ءتيىمدى الاڭ بولىپ سانالادى. ول جەردە 500 كيلوۆولتتىق تارماقتالعان جەلىلەر بار، وڭتۇستىك-گرەسس 500 قوسالقى ستانسياسى دا ورنالاسقان. ال بازالىق قۋات كوزدەرىن ورنالاستىرۋدىڭ ارقاسىندا سولتۇستىك-وڭتۇستىك باعىتىندا ەلەكتر ەنەرگياسىنىڭ تۇراقتى ءترانزيتىن جاساۋعا بولادى. ورتالىق قازاقستانعا – قاراعاندىعا دا، سولتۇستىك-وڭتۇستىك ترانزيتىمەن وڭتۇستىك وڭىرلەرگە دە ەنەرگيانى قايتا بولۋگە ىڭعايلى، – دەدى ساتقالييەۆ جۋرناليستەرگە بەرگەن سۇحباتىندا دەپ جازادى Sputnik قازاقستان باسىلىمى.

ونىڭ ايتۋىنشا، قازىرگى كەزدە اتوم ەلەكتر ستانسياسىنا قاجەتتى قۇرال-جابدىقتاردى شىعاراتىن كاسىپورىنداردان بىرنەشە ۇسىنىس تۇسكەن.

– رەسەي، جۇڭگو مەن فرانسيادان، سونىمەن قاتار امەريكالىق وندىرۋشىلەردەن ەكى ۇسىنىس ءتۇستى. ءبىز شەشىم قابىلداعاندا تەحنولوگيالاردىڭ قاۋىپسىزدىگىن، سونىڭ نەگىزىندە قانشا اتوم رەاكتورلارى سالىندى، باعاسى جانە تاعى باسقا ماسەلەلەردى ەسكەرەتىن بولامىز. اەس-كە قاجەتتى وتىندى قازاقستاندا شىعارۋ جايىن دا قارايمىز، – دەدى قور باسشىسى.

قازاقستاندا بىرنەشە جىلدان بەرى اتوم ەلەكتر ستانسياسىن سالۋ يدەياسى كوتەرىلىپ كەلەدى. ەنەرگەتيكتەر اەس قاجەتتىلىگىن ەنەرگەتيكالىق تاپشىلىقپەن تۇسىندىرەدى. پرەزيدەنت ق.توقايەۆ بيىلعى جولداۋىندا 2030 جىلدارعا قاراي قازاقستاندا ەلەكتر ەنەرگياسىنىڭ تاپشىلىعى بولاتىنىن ايتقان.

الايدا قوعامدا اەس سالۋعا قارسى كوڭىل-كۇي باسىم. ارىس قالاسى، جامبىل وبلىسىنداعى اسكەري قويمالاردا بولعان جارىلىستان كەيىن اەس سالۋ يدەياسىنا دەگەن تەرىس كوزقاراس ارتا تۇسكەن. ازاماتتار اراسىندا ەكى جىلدا ەكى بىردەي جويقىن جارىلىسقا جول بەرىپ قويعان ۇكىمەتتىڭ ارەكەتىنە كۇمانمەن قارايتىندار باسىم. "اەس سالىپ، سوڭى ۇلكەن قايعىلى جاعدايعا ۇرىندىرىپ جۇرمەسىنە كىم كەپىل" دەگەن مازمۇنداعى پىكىرلەر ءجيى ايتىلادى.