پارلامەنت ءماجىلىسىنىڭ دەپۋتاتى قازىبەك يسا پرەمەر-مينيستردىڭ ورىنباسارى ەرالى توعجانوۆقا الاش كوسەمى احمەت بايتۇرسىن ۇلىنىڭ 150 جىلدىعىنا بايلانىستى دەپۋتاتتىق ساۋال جولدادى.

دەپۋتات مەرەيتويعا بايلانىستى ۇكىمەت كوميسسيا قۇرىپ، جۇمىس جوسپارىن جاساعانىنا قاراماستان، احمەت بايتۇرسىنۇلىن ۇلىقتاۋ ماقساتىندا جاسالۋعا ءتيىس شارالار جەتكىلىكتى دەپ سانايدى.

قازبەك يسا قايراتكەردىڭ تۋعان جەرى قوستاناي قالاسىنداعى اۋەجايعا احمەت بايتۇرسىن ۇلىنىڭ اتىن بەرۋ كەرەكتىگىن، بارلىق وبلىس ورتالىقتارىندا ەسكەرتكىش قويىپ، تۇركيادا انكارادا، رەسەيدە ورىنبوردا، وزبەكستاندا تاشكەنتتە، ءازىربايجاندا باكۋدە ەسكەرتكىشتەرىن ورناتۋعا قول جەتكىزۋ كەرەكتىگىن ايتادى.

دەپۋتات اقجول فراكسياسىنىڭ اتىنان تومەندەگىدەي ۇسىنىستار بىلدىرگەن. 

1. احمەت بايتۇرسىن ۇلىنىڭ تۋعان اۋدانى مەن اۋىلىن جانداندىرۋ ءۇشىن تۋعان جەرىندە مەموريالدىق كەشەن سالۋ كەرەك.

2. احمەت بايتۇرسىن ۇلىنىڭ تۋعان اۋىلىنا جول سالىنۋى كەرەك.

3. احاڭداي ۇلى تۇلعانى دۇنيەگە سىيلاعان بايتۇرسىن بابامىزدىڭ قاراۋسىز قالعان، ايانىشتى كۇيدەگى ءقابىرى مەن قورىمىن قولعا الۋ كەرەك.

4. قوستانايداعى اۋەجايعا احمەت بايتۇرسىن ۇلى اتىن بەرۋ كەرەك.

5. الماتىداعى احمەت بايتۇرسىن ۇلى مۋزەي-ۇيىنە ۇلتتىق ستاتۋس بەرىلىپ، شتات سانى شەشىلىپ، مەملەكەت قامقورلىعىنا الىنۋى كەرەك.

6. وسى مۋزەي-ۇي جانىنداعى جەر تەلىمىنە الاش ءۇيى عيماراتىن سالۋ، الاش ارىستارى مۇراسىن كەشەندى زەرتتەۋ ورتالىعىن ۇيىمداستىرۋ؛

7. الماتىداعى احمەت بايتۇرسىن ۇلى ساياباعىنا (1998 ج) تاريحي تۇلعانىڭ ەڭسەلى ەسكەرتكىشىن قويۋ؛

8. احمەت بايتۇرسىن ۇلى اتىنداعى ءتىل ءبىلىمى ينستيتۋتىنا ايرىقشا ستاتۋس، قارجىلىق قولداۋ قاجەت.

9. الماتىداعى احمەت بايتۇرسىن ۇلى اتىنداعى ءتىل ءبىلىمى ينستيتۋتى عيماراتىنىڭ الدىنا عالىمنىڭ ەسكەرتكىشىن ورناتۋ.

10. كەلەسى جىل – يۋنەسكو بويىنشا احمەت بايتۇرسىن ۇلى جىلى بولعاندىقتان، ءتىل اتاسى قۇرمەتىنە ەلىمىزدە كەلەسى 2022 جىل – مەملەكەتتىك ءتىل جىل بولۋى ءتيىس.

11. استانامىز بەن بارلىق وبلىس ورتالىقتارىندا احاڭنىڭ ەسكەرتكىشى تۇرۋى ءتيىس! رەسەيدە ورىنبوردا، انكارادا، تاشكەنتتە، باكۋدە ەسكەرتكىشتەرىن ورناتۋ كەرەك.

12. ەلىمىزدىڭ استاناسىندا احاڭ اتىنداعى كوپ سالالى مادەني-تانىمدىق ورتالىق اشىلۋى ءتيىس.

13. احاڭنىڭ اسىل مۇرالارىن تۇركى الەمىنە ناسيحاتتاۋ جۇمىسى جولعا قويىلۋى كەرەك.

14. "قازاق" گازەتىنىڭ 7 تومدىعىن، "ايقاپ" جۋرنالىنىڭ 5 تومدىعىن، "سارىارقا" گازەتىنىڭ 1 تومدىعىن شىعارۋ كەرەك.

15. ءتىل ءبىلىمى ينستيتۋتى استىنداعى "ماركا" گەي-كلۋبى، "بارۆيحا" تۇنگى كلۋبتارىن جابۋ كەرەك.