فرانسۋز گۆياناسىنىڭ كۋرۋ عارىش ايلاعىنان قۇنى 10 ميلليارد دوللارلىق دجەيمس ۋەبب تەلەسكوبى "Ariane" زىمىرانى ارقىلى اسپانعا كوتەرىلدى.

ونىڭ وربيتاعا جەتۋى جارتى ساعاتقا سوزىلدى. كەنيانىڭ مالينديىندەگى انتەننا ناتيجە ءساتتى بولعانىن راستادى.

اپوللون ايعا قونۋ ميسسياسى ساۋلەتشىلەرىنىڭ ءبىرىنىڭ اتىمەن اتالعان ۋەبب تەلەسكوبىن حاببل تەلەسكوبىنىڭ مۇراگەرى دەپ ايتۋعا بولادى.

الايدا اقش، ەۋروپا جانە كانادا عارىش اگەنتتىكتەرىمەن جۇمىس ىستەيتىن ينجەنەرلەر جاڭا تەلەسكوپتى حاببلدان 100 ەسە قۋاتتى ەتىپ جاساعان.

سوڭعى 30 جىل ىشىندە بۇكىل الەم بويىنشا مىڭداعان ادام جوبامەن جۇمىس ىستەدى.

جاڭا تەلەسكوپتى ۇشىرۋداعى نەگىزگى ماقسات – 13،5 ميلليارد جىلدان استام ۋاقىت بۇرىن ۇلكەن جارىلىستان كەيىن كوپ ۇزاماي عارىشتا پايدا بولعان العاشقى جۇلدىزدار ءداۋىرىن زەرتتەۋ.

العاشقى جۇلدىزدارداعى يادرولىق رەاكسيالاردىڭ ناتيجەسىندە تىرشىلىككە قاجەتتى ەڭ العاشقى اۋىر اتومدار – كومىرتەگى، ازوت، وتتەگى، فوسفور جانە كۇكىرت پايدا بولعان.

ۋەبب تەلەسكوبىنىڭ تاعى ءبىر باستى ماقساتى – الىستاعى پلانەتالاردىڭ اتموسفەراسىن زەرتتەۋ. بۇل وزگە عالامشارلاردا ءومىر سۇرۋگە بولاتىن-بولمايتىنىن انىقتاۋعا كومەكتەسەدى.

"ءبىز استروفيزيكانىڭ مۇلدە جاڭا رەجيمىنە، جاڭا داۋىرگە ەنەتىن بولامىز" دەدى استرونوم جانە ميسسياعا جاۋاپتى عالىم حايدي حاممەل. سونىمەن قاتار ول ۋەبب تەلەسكوبى "تاريحي ميسسيا" ورىنداۋعا كەتىپ بارا جاتقانىن اتادى.