ءماجىلىس وتىرىسىندا ورتالىق سايلاۋ كوميسسياسىنىڭ مۇشەسى اسىلبەك سماعۇلوۆ ءماجىلىس دەپۋتاتى بەكبولات تىلەۋحاننىڭ مانداتىنان باس تارتۋعا ءوزى ءوتىنىش بەرگەنىن ءمالىم ەتتى. بۇل تۋرالى  Ulysmedia.kz. باسىلىمى حابارلادى.

نۇرلان نىعماتۋلين ەكس-دەپۋتاتقا ريزاشىلىق ءبىلدىرىپ، العىس حات تاپسىرعان.

– بەكبولات قاناي ۇلىنىڭ بارشاڭىز جاقسى بىلەسىزدەر. ەلىمىزدە، حالقىمىزدا تانىمال تۇلعا. بۇگىن دە بەكبولات تىلەۋحاننىڭ بىلمەيتىن قازاق جوق دەسەك ارتىق بولمايدى. ول ساياساتتا بولسىن، ونەردە نەمەسە قوعامدىق ومىردە بولسىن، ۇلكەن ابىروي جيناپ كەلە جاتقان ازاماتتاردىڭ ءبىرى. بىرنەشە شاقىرىلىم ءماجىلىس دەپۋتاتى بولدى. حالىققا قاجەتتى زاڭداردى قابىلداۋعا ىقپال ەتتى. اسىرەسە الەۋمەتتىك-مادەني دامۋ جولىندا بەكبولات قاناي ۇلىنىڭ ەڭبەگى زور. ەندى مىنە، بۇكىلالەمدىك ەتنوسپورت كونفەدەراسياسىنىڭ ءبىرىنشى ۆيسە-پرەزيدەنتى بولىپ تاعايىندالدى. سوندىقتان ارىپتەسىمىزگە العىس بىلدىرە وتىرىپ، الداعى ۋاقىتتا دا زور دەنساۋلىق، جاڭا قىزمەتتە تابىس تىلەيمىز،  – دەدى ول.

بەكبولات تىلەۋحان دا ماجىلىستەگى ارىپتەستەرىنە، ەلباسى مەن پرەزيدەنتكە العىس ايتتى.

– ءقادىرلى ارىپتەستەر! ءقادىرلى نۇرلان زايروللا ۇلى! اسىرا ماقتاپ ايتىپسىز. ءبىراق وسى اسىرا ماقتاۋعا لايىقپىن با دەگەنگە كۇمانىم بار. دەگەنمەن اعالىق نيەتىڭىزگە، ارىپتەستىك كوڭىلىڭىزگە شىن جۇرەكتەن العىس بىلدىرەمىن. سىزدەرمەن جۇمىس ىستەگەن ءساتىم – ءومىرىمنىڭ ءبىر بەلەسى، كەزەڭى. تايىمدا تانىپ، تۇلپارداي قىلىپ قوسقان اۋەلى ەلباسىما راحمەت! نۇراعامىزدىڭ باستاعان جولىن ارى قاراي جالعاستىرىپ جاتقان، مەملەكەت باسشىمىز قاسىم-جومارت كەمەل ۇلىنىڭ وسى قامقورلىعىنا، ماراپاتتارىنا شەكسىز العىسىمدى بىلدىرەمىن. سىزدەرمەن ىستەگەن كەزەڭ، پارلامەنت قابىرعاسىنداعى ءومىرىم وتە ءبىر ءساتتى كەزەڭ دەپ بىلەم. قاي جەردە مەملەكەتكە پايدام كوبىرەك تيەدى – سول جەردە بولعاندى مىندەت دەپ تانىپ، ءومىردىڭ كەلەسى كەزەڭىنە قادام باسىپ جاتىرمىن. ءبىراز جۇمىس ىستەدىك. ارتىق-اۋىز ءسوزىم مەن جازا باسقان كەزىم بولسا، كەيبىر ارىپتەستەرىمنەن كەشىرىم سۇرايمىن، عافۋ وتىنەم، – دەدى بەكبولات تىلەۋحان.

ءسوز سوڭىندا ول ماجىلىسمەندەرگە بازىناسىن جەتكىزدى.

– قازاق دەيتىن ۇلتتىڭ ءتىلىنىڭ، مادەنيەتىنىڭ، تاريحىنىڭ، عىلىمىنىڭ، رۋحانياتىنىڭ، ءسالت-داستۇرىنىڭ قازاقستان رەسپۋبليكاسىنان باسقا بارار-جەر، باسار تاۋى جوق. قازاق ءبىر شابۋىلشى جۇرت ەمەس، قورعانۋشى جۇرت. تاريحتا ەسەسى كەتكەن جۇرت. وسى نارسەنى ەستەرىڭىزدە بولىپ، ەسىركەي قاراعان، پاراسات كوزدەرىڭىز، اناۋ جۇرەكتەرىڭىزدىڭ تۇكپىرىندە تاريحي سانامەن، مەملەكەتشىل ويمەن، ءارقاشان جۇرەكتەرىڭىزدىڭ تۇكپىرىندە تۇرسا ەكەن دەگەن دەپۋتات رەتىندە ەمەس، سايلاۋشى رەتىندە ءبىر اماناتىم بار. ءوتىنىشىم بار. ىستەرىڭىزگە بەرەكە تىلەيمىن. ءتاڭىردىڭ راقىمى بولسىن، سىزدەرگە! اسسالاۋماعالەيكۇم. راحمەت!، – دەدى ول.

بەكبولات تىلەۋحان 1966 جىلى 7 تامىزدا قاراعاندى وبلىسى جاڭاارقا اۋدانىندا تۋعان.

1993 جىلى قۇرمانعازى اتىنداعى الماتى مەملەكەتتىك كونسەرۆاتورياسىن "كونسەرتتىك ورىنداۋشى" ماماندىعى بويىنشا، 1998 جىلى ق.ساتبايەۆ اتىنداعى قازاق مەملەكەتتىك تەحنيكالىق ۋنيۆەرسيتەتىن "ينجەنەر-مەتاللۋرگ" ماماندىعى بويىنشا بىتىرگەن.

ەڭبەك جولىن 1996 جىلى پرەزيدەنت وركەستىرىنىڭ كوركەمدىك جەتەكشىسى قىزمەتىنەن باستاعان.

ءار جىلدارى مادەنيەت سالاسىندا، اتاپ ايتقاندا مادەنيەت كوميتەتىنىڭ ءتوراعاسى، مادەنيەت، اقپارات جانە قوعامدىق كەلىسىم ۆيسە-مينيسترى، مادەنيەت ۆيسە-مينيسترى قىزمەتتەرىن اتقارعان.

2004-2011 جىلدارى ەكى مارتە ءماجىلىس دەپۋتاتى بولىپ، 2012 جىلى ۇلتتىق سپورت تۇرلەرى قاۋىمداستىعىنىڭ پرەزيدەنتى اتانادى. قوعامدىق قاۋىمداستىقتى ءالى كۇنگە دەيىن باسقارادى.

2016 جىلى قايتادان دەپۋتات اتانىپ، 2021 جىلعى ءماجىلىس سايلاۋىنان كەيىن دە پارلامەنتتەگى ورنىنا ورالعان. NurOtan پارتياسىنىڭ مۇشەسى.

بەكبولات تىلەۋحان كوپشىلىككە و باستا ۇلتتىق-پاتريوتتىق اندەردىڭ، تەرمەلەردىڭ ورىنداۋشىسى، شەشەن سويلەيتىن، اڭگىمەسىنە تىڭداۋشىسىن ۇيىتا الاتىن ادام رەتىندە تانىلدى. ونىڭ ورىنداۋشىلىق ونەرىن، ۇلتتىق باعىتتاعى ايتقان اڭگىمەلەرىن ىقىلاسپەن تىڭدايتىندار، جوعارى باعالايتىندار كوپ بولدى.

كەيىننەن دەپۋتات بولىپ، ءبىرقاتار داۋلى وقيعالاردىڭ ورتاسىندا قالدى. ماسەلەن، 2016 جىلى جەر ماسەلەسى قوعامدا قىزۋ تالقىلانىپ جاتقاندا "جەر شەتەلدىكتەرگە جالعا بەرىلەدى، جەردىڭ يەسى بولۋى كەرەك، ول دامۋى كەرەك" دەگەن سوزدەر ايتىپ سىنعا ءىلىندى.

2020 جىلى مامىردا "حالىق دەنساۋلىعى جانە دەنساۋلىق ساقتاۋ جۇيەسى تۋرالى" كودەكس تالقىلانىپ جاتقاندا سول كەزدەگى دەنساۋلىق ساقتاۋ ءمينيسترى ەلجان ءبىرتانوۆ كەي ۆاكسينالار مىندەتتى بولاتىنىن، بۇل ينفەكسيالىق اۋرۋلاردىڭ الدىن الۋعا، ازاماتتاردىڭ دەنساۋلىعىن ساقتاۋعا باعىتتالعانىن، اتا-انالار بالالارىنا ەكپە سالدىرماۋىنىڭ سالدارىنان بۇرىن ۇمىت بولعان اۋرۋ تۇرلەرى قايتا شىعا باستاعانىن ايتقان. الايدا بەكبولات تىلەۋحان دەپۋتاتتاردىڭ ىشىندە جالعىز ءوزى مىندەتتى ۆاكسيناسياعا قارسىلىق بىلدىرگەن.

سول جىلدىڭ تامىزىندا جۋرناليست سەرىك بوقان بەكبولات تىلەۋحاننان قارعىس ەستىگەنىن ايتىپ، دالەل رەتىندە ەكەۋارا اڭگىمەنىڭ اۋديوجازباسىن جاريالاعان. ەكس-دەپۋتات مۇنداي جاعدايدىڭ بولعانىن جوققا شىعارماي، ءجۋرناليستى اشۋمەن قارعاعانىن ءمالىم ەتكەن. وسى وقيعا الەۋمەتتىك جەلىدە قىزۋ تالقىلانىپ جاتقاندا بەلگىلى جۋرناليست سەرىك ابباس-شاح بۇعان دەيىن بەكبولات تىلەۋحانمەن كەزدەسىپ قالعانىندا ەكس-دەپۋتات ءوزىن قارعىس تىزىمىنە قوسقانىن ايتقانى تۋرالى جازعان.

2020 جىلدىڭ قىركۇيەگىندە جۋرناليست توقتار جاقاش Facebook پاراقشاسىندا شەتەلگە زاڭسىز قارۋ ساتىپ ۇستالدى دەلىنگەن ادامنىڭ ۆيدەوسىن جاريالادى. ول جەردەگى ادام شەتەلگە قارۋ ساتۋدا دەپۋتات بەكبولات تىلەۋحان قولداۋ بىلدىرەتىنىن جەتكىزگەن. ەكس-دەپۋتات ۆيدەوداعى ايتىلعاندار تولىقتاي جالا ەكەنىن، ابىروي-بەدەلىنە نۇقسان كەلتىرەتىن جالعان اقپارات بەرۋشى ۆيدەوداعى تۇلعالاردى انىقتاۋ ءۇشىن قۇزىرلى ورگاندارعا شاعىمدانعانىن ءمالىم ەتكەن.

سونداي-اق ول 2021 جىلعى ناۋرىزدا الماتىدا وتكەن فەمينيستر شەرۋىنە "ازعىندىق"، "قۇبىجىق قۇبىلىس" دەپ باعا بەرگەن.

8 جەلتوقساندا ازاتتىق راديوسى جۋرناليسىنە ارون اتابەك تۋرالى ايتقاندارى دا جەلىدە قىزۋ تالقى تۋدىردى.

ول 15 جىل بۇرىنعى شاڭىراق وقيعاسى كەزىندە ۇيلەرىن قورعاۋعا تىرىسقان حالىقتىڭ نارازىلىعىن كۇشپەن باسۋدى "زاڭدى ارەكەت" دەپ سيپاتتاۋعا تىرىسىپ، 2006 جىلدارى دەپۋتات بولىپ تۇرعان تۇستا ارون اتابەك، شاڭىراق ماسەلەسىن كوتەرىپ، دەپۋتاتتار نازارىن ۇيلەرىن زاڭداستىرا الماي جۇرگەن ازاماتتاردىڭ ماسەلەسىنە اۋدارتقانىن ايتادى. ءبىراق سول كەزدە "ەموسياعا بەرىلىپ" ماسەلەنىڭ بايىبىنا بارماي "قىزۋ كىرىسكەنىن"، ارتىنان "وپىق جەگەنىن" جەتكىزدى. 

– باسىندا تۇسىندىرگەن كەزدە ول كىسى (ارون اتابەك – رەد.) كەرەمەت شەشەن بولدى. ەلپىلدەپ كەتتىم. شىنىمەن قىزۋ كىرىستىم. شاڭىراقتىڭ ماسەلەسىن پارلامەنت قابىرعاسىندا كادىمگىدەي قوزعادىم. [ارىپتەستەرىم] "بەكبولات، سەن ەموسياعا سالىنبا، تۇرا تۇر، بۇل نارسەنى تەكسەرىپ ال!" دەدى. مەن تەكسەرمەستەن كىرىستىم. سول كەزدەگى ىشكى ىستەر ءمينيسترى باۋىرجان مۇحامەدجانوۆتى پارلامەنتكە شاقىردىم... كەيىن [ءىستىڭ ءمان-جايىن] ماعان تۇسىندىرگەن كەزدە ىستەپ جاتقان نارسەلەردىڭ بارلىعى قاراپ وتىرساق، شىنىندا دا ءبارى دالەلدەنگەن، ايتىپ وتىرعان ايعاقتاردىڭ بارلىعىنا كوزىمدى جەتكىزدى، – دەدى بەكبولات تىلەۋحان ازاتتىق راديوسى جۋرناليسىنە.

سونداي-اق ول اقش كونگرەسى تاراپىنان قارجىلاندىرىلاتىن حالىقارالىق باسىلىم ءجۋرناليسىن "امەريكانىڭ سويىلىن سوعىپ ءجۇرسىڭ" دەگەن سىڭايدى ايىپتاپ، ءجۋرناليستى "ەلبۇزار" دەپ اتاعان.

بۇگىن جۋرناليستەرگە وكىلەتتىگىن توقتاتۋى 8 جەلتوقسانداعى داۋلى سوزدەرىمەن بايلانىستى ەمەستىگىن، شەشىم قىركۇيەكتە قابىلدانىپ قويعانىن ايتقان.