​​قازاقستاننىڭ سىرتقى ىستەر مينيسترلىگى جەكەلەگەن شەتەلدىك باق-تارداعى جاريالانىمدارعا قاتىستى پىكىر ءبىلدىردى. 

مينيسترلىكتىڭ حابارلاۋىنشا، ەلدە توتەنشە جاعداي ەنگىزىلگەننەن بەرى قالىپتاسقان احۋالعا بايلانىستى شەتەلدىك باق-تاعى ءبىرقاتار جاريالانىمدار ءاتۇستى جانە ءبىرجاقتى سيپاتتا بولعان.

وسىعان بايلانىستى سىرتقى ىستەر مينيسترلىگى كەلەسىنى اتاپ ءوتتى.

• ماڭعىستاۋ وبلىسى مەن ەلدىڭ بارلىق ءىرى قالالارىندا بەيبىت ميتينگتەر ءوتتى. ولاردىڭ تالاپتارى تولىق قاناعاتتاندىرىلعان. الايدا، تەررورشىل، ەكسترەميستىك جانە قىلمىستىق توپتار شيەلەنىس پەن زورلىق-زومبىلىقتى ۋشىقتىرۋ ءۇشىن بۇل جاعدايدى ءوز مۇددەسىنە پايدالانىپ العان. وسىعان بايلانىستى ەلدە توتەنشە جاعداي جاريالاندى.
• الماتى قالاسىنداعى جانە ەلدىڭ باسقا دا وڭىرلەرىندەگى وقيعالار كورسەتكەندەي، قازاقستان شەتەلدە دايىندىقتان وتكەن جانە جاقسى ۇيلەستىرىلگەن تەررورشىل توپتاردىڭ شابۋىلىنا تاپ بولدى. الدىن الا مالىمەتكە قاراعاندا، شابۋىلشىلاردىڭ اراسىندا جانجال ايماقتارىندا ءدىني راديكالدىق توپتاردىڭ قاتارىندا قاقتىعىستارعا قاتىسۋ تاجىريبەسىنە يە ادامدار بار.
• قازىرگى ۋاقىتتا قازاقستاننىڭ قۇقىق قورعاۋ ورگاندارى مەن قارۋلى كۇشتەرى، كەيبىر شەتەلدىك ب ا ق بۇرمالاپ كورسەتكەندەي، "بەيبىت سيپاتتاعى نارازى توپتارعا" ەمەس، تەرروريستەرگە قارسى تۇرۋدا.
• قالىپتاسقان جاعدايدا، قازاقستان ۇجىمدىق قاۋىپسىزدىك تۋرالى شارت ۇيىمىنا (ۇقشۇ) كومەككە جۇگىنۋگە ءماجبۇر بولعان، ول جاعدايدى تۇراقتاندىرۋ ماقساتىندا جالپى سانى 2 500 ادام قۇرايتىن بىتىمگەرشىلىك كۇشىن جىبەرگەن. بىتىمگەرشىلەردىڭ مانداتىنا ستراتەگيالىق نىسانداردى كۇزەتۋ جانە قازاقستاندىق قۇقىق قورعاۋ كۇشتەرىنە جاردەمدەسۋ كىرەدى.

تەررورشىل توپتارعا قارسى نەگىزگى ءىس-قيمىلدى قازاقستاننىڭ قۇقىق قورعاۋ ورگاندارى مەن قارۋلى كۇشتەرى جۇرگىزەتىنىنە نازار اۋدارامىز.

ۇقشۇ-دىڭ بىتىمگەرشىلىك كۇشتەرى قازاقستاندا ۋاقىتشا نەگىزدە بولاتىنىن جانە جاعداي تۇراقتالعان سوڭ قازاقستان تاراپىنىڭ ءبىرىنشى سۇراۋى تۇسكەن كەزدە ءوز ەلدەرىنە ورالاتىنىن اتاپ ءوتتى.

قۇقىق قورعاۋ ورگاندارىنا قالىپتاسقان جاعدايدىڭ سەبەپتەرىنە كەشەندى تەرگەۋ جۇرگىزۋ تاپسىرىلدى، ونىڭ ناتيجەلەرى حالىقارالىق قوعامداستىققا جەتكىزىلەتىن بولادى.

قاقتىعىستاردىڭ سالدارىنان ەلىمىزدىڭ ازاماتتارى، سونىڭ ىشىندە قۇقىق قورعاۋ ورگاندارىنىڭ قىزمەتكەرلەرى مەن اسكەريلەر قازا تاپتى.

وسىعان بايلانىستى، 2022 ج. 10 قاڭتار ەلىمىزدە جالپىۇلتتىق ازا تۇتۋ كۇنى بولىپ جاريالاندى.