قازاقستانداعى بولىپ جاتقان كۇردەلى جاعداي تۋرالى BBC، Reuters، The Guardian سياقتى شەتەلدىك ءىرى باسىلىمدار جارىسا جازىپ جاتىر.

"قازاقستاندا العاشىندا بەيبىت باستالعان نارازىلىق شەرۋلەرىنىڭ سوڭى زورلىق-زومبىلىققا ۇلاسىپ، سالدارىنان كەم دەگەندە 164 ادام قازا تاپتى" دەپ حابارلادى BBC.

قازاقستان پرەزيدەنتىنىڭ كەڭسەسى جەكسەنبىدە 6 مىڭعا جۋىق ادام قاماۋعا الىنعانىن، ونىڭ ىشىندە كوپتەگەن شەتەل ازاماتتارى بار ەكەنىن مالىمدەدى.

"شەرۋ 2 قاڭتاردا سۇيىتىلعان گاز باعاسىنىڭ قىمباتتاۋىنان باستالىپ، ارتىنشا قازاقستاندى وتىز جىل بويى باسقارعان جانە ءالى دە ەلەۋلى ىقپالىن ساقتاپ وتىر دەپ ەسەپتەلەتىن بۇرىنعى پرەزيدەنت نۇرسۇلتان نازاربايەۆقا نارازىلىققا ۇلاستى. وتكەن اپتادا قازاقستانعا ءتارتىپتى ورناتۋعا كومەكتەسۋ ءۇشىن رەسەيدى قامتىعان بىرنەشە ەلدىڭ اسكەرلەرى جىبەرىلدى" دەپ جازدى BBC.

قازاقستانداعى تارتىپسىزدىك پەن زورلىق-زومبىلىققا بايلانىستى شەتەلدىك باسپاسوزدەر ءار ءتۇرلى ساراپتاما جاسادى.

"قازاقستاندىق ەليتانىڭ ىشىندەگى ىقتيمال قاقتىعىستار تۋرالى ەسەپتەر زورلىق-زومبىلىقتىڭ نەگىزگى سەبەبى بولۋى مۇمكىن" دەگەن بولجام سەنىمدىرەك سياقتى" دەپ جازادى بريتانيالىق The Guardian گازەتى.

قازاقستان ۇقك باسشىسى، بۇرىنعى پرەمەر-مينيستر كارىم ءماسىموۆ الدىمەن قىزمەتىنەن شەتتەتىلىپ، ءبىر اپتا ىشىندە "مەملەكەتكە وپاسىزدىق جاسادى" دەگەن كۇدىكپەن قاماۋعا الىندى. "ءماسىموۆتىڭ نە ىستەگەنى" تۋرالى تولىق مالىمەت ايتىلمادى.

The Guardian قازاقستانداعى جاعداي ءۇشىن "كەيبىر اقپارات كوزدەرى توقايەۆ پەن نۇرسۇلتان نازاربايەۆقا جاقىن تۇلعالار اراسىنداعى سوڭعى كەلىسپەۋشىلىكتەردى ايىپتادى" دەپ جازدى.

ال، BBC "بۇل زورلىق-زومبىلىق جاعدايى قازاقستاننىڭ بيلەۋشى ەليتاسىنداعى بيلىك ءۇشىن تالاسپەن بايلانىستى" دەگەن بولجامدار كوبەيىپ كەلەدى" دەگەن پىكىر ايتادى.

باسىلىم سونىمەن قاتار، بۇلىكشىلەر الماتىنى باسىپ الۋعا ارەكەتتەنگەنىن جانە قالاداعى پوليسيا بەكەتتەرىن باقىلاۋعا الۋعا تىرىسقانىن، قازاقستان قاۋىپسىزدىك كۇشتەرى ولاردىڭ كوزىن جويعانىن حابارلاعان.

BBC پرەزيدەنت قاسىم-جومارت توقايەۆتىڭ الماتىعا 20 مىڭ تەرروريست شابۋىل جاساعانىن مالىمدەگەنىن جازدى. باسىلىم سونىمەن قاتار توقايەۆتىڭ قارسىلاسقاندارعا "ەسكەرتۋسىز وق اتۋدى" تاپسىرعانىن حابارلادى.

فرانسيا "ەۋروپانىڭ سىرتقى ىستەر مينيسترلەرى وسى اپتادا قازاقستانداعى جاعدايعا جاۋاپ رەتىندە ىقتيمال شارالاردى قاراستىرادى" دەپ مالىمدەدى. فرانسيانىڭ ەۋروپا ىستەرى ءمينيسترى كلەمەنت بون CNEWS-كە بەرگەن سۇحباتىندا "قازاقستان بيلىگى" ەۋروپا قابىلداي الاتىن شارالاردى تالقىلاۋ كەرەك: حالىقتىڭ، نارازىلىق بىلدىرۋشىلەردىڭ، كوتىرىلىسشىلەردىڭ ءومىر ءسۇرۋ قۇنىن تاركى ەتىپ، باسىپ تاستاي المايسىز" دەدى.

اقش مەملەكەتتىك حاتشىسى ەنتوني بلينكەن جەكسەنبى كۇنى قازاقستان پرەزيدەنتىنىڭ نۇسقاۋىن سىنعا العان. "اتىپ ءولتىرۋ ءتارتىبى، ول قانشالىقتى بولسا دا، دۇرىس ەمەس جانە شەشىم جويىلۋى كەرەك. ءبىز جاريالانعان توتەنشە جاعدايعا الاڭدايمىز" دەپ سۇحبات بەردى ول ABC News تەلەارناسىنا.

ونىڭ ايتۋىنشا، اقش قازاقستان پرەزيدەنتىنەن نەلىكتەن رەسەيلىك اسكەرلەردىڭ قاتىسۋىن سۇراعانىن ءتۇسىندىرۋدى دە سۇراپ وتىر.

تاعى ءبىر جاڭالىق بويىنشا، قاماۋدا جاتقان، قاتتى سوققىعا جىعىلعانى بەينەلەنگەن كادرلار پايدا بولعان قىرعىز دجاز مۋزىكانتىنىڭ قازاقستاندا ۇستالۋىنا بايلانىستى كورشى قىرعىزستان قازاقستانعا نارازىلىق بىلدىرگەن.

قازاقستان ۆيكرام رۋزاحۋنوۆتى نارازىلىق اكسيالارىنا قاتىستى دەپ ايىپتاپ، ونى مەملەكەتتىك تەلەارنادان كورسەتكەن.