داريعا نازاربايەۆا ناۋقاستانۋىنا بايلانىستى ءماجىلىس وتىرىستارىنا قاتىسقان جوق. بۇلاي دەپ پارلامەنت ءماجىلىسىنىڭ باسپا ءسوز قىزمەتى حابارلادى.
– ول دا باسقا ارىپتەستەرى سياقتى دەنساۋلىعىنا بايلانىستى دەمالىس الىپ، بۇگىنگى وتىرىسقا قاتىسقان جوق، – دەدى باسپا ءسوز قىزمەتىنىڭ ماماندارى.
داريعا نازاربايەۆا ءماجىلىستىڭ 5 قاڭتاردا وتكەن وتىرىسىنا دا قاتىسپاعان.
ول كەشە پرەزيدەنت قاسىم-جومارت توقايەۆ ءماجىلىس دەپۋتاتتارىنا جاڭا پرەمەر-مينيستردى تانىستىرعان وتىرىسقا دا قاتىسقان جوق.
ءماجىلىستىڭ جەتىنشى شاقىرىلىمىندا داريعا نازاربايەۆا Nur Otan پارتياسىنىڭ ءتىزىمى بويىنشا دەپۋتاتتىق مانداتقا يە. ول ەكونوميكالىق رەفورما جانە ايماقتىق دامۋ كوميتەتىنىڭ قۇرامىنا كىرەدى.
بۇعان دەيىن كوميتەت باسشىسى البەرت راۋ داريعا نازاربايەۆانىڭ ەڭبەك ءتارتىبىن بۇزباعانىن جانە جۇمىسقا دالەلدى سەبەپپەن كەلمەي جۇرگەنىن ايتقان.
بەيرەسمي اقپاراتتاردا قازاقستانداعى جاپپاي تارتىپسىزدىك كەزىندە بۇرىنعى پرەزيدەنت نۇرسۇلتان نازاربايەۆ پەن ونىڭ وتباسى مۇشەلەرى شەتەلگە كەتىپ قالعانى تۋرالى ايتىلادى.
ن.نازاربايەۆتىڭ باسپا ءسوز حاتشىسى ايدوس ۇكىباي اقپارات شىندىققا جاناسپايتىنىن، نازاربايەۆ نۇر-سۇلتان قالاسىندا پرەزيدەنت قاسىم-جومارت توقايەۆپەن تىكەلەي بايلانىسىپ وتىرعانىن مالىمدەگەن.
پىكىر قالدىرۋ