يندۋستريا جانە ينفراقۇرىلىمدىق دامۋ مينيسترلىگى الماتى اۋەجايى 13 قاڭتاردان باستاپ جۇمىسىن قايتا باستايتىنىن حابارلادى.
اۋەجاي باسشىلىعىنىڭ اقپاراتى بويىنشا اۋە كومپانيالارىنىڭ ۇشۋ كەستەسىنە سايكەس ىشكى جانە حالىقارالىق رەيستەر ساعات 8.00-دەن 21.00-گە دەيىن ورىندالادى.
مينيسترلىك "قتج" ۇك" اق نۇر-سۇلتان قالاسى اكىمدىگىمەن بىرلەسىپ، ەلوردالىق ۆوكزالدارعا ارنايى اۆتوبۋستارمەن تۋريستەر ترانسفەرىن ۇيىمداستىراتىنىن ءمالىم ەتتى. ۆوكزالدارداعى بيلەت كاسسالارى تاۋلىك بويى جۇمىس ىستەيدى.
ۋاكىلەتتى ورگان تۋريستەردىڭ كەلۋى تۋرالى اقپاراتتى ۇسىنۋىنا قاراي نۇر-سۇلتاننان جولاۋشىلاردى جونەلتۋدى ۇيىمداستىراتىن بولادى.
قازىرگى ۋاقىتتا بارلىق جولاۋشىلار پويىزدارى كەستە بويىنشا جانە قازاقستاننىڭ بارلىق باعىتتارىنا جۇرەدى. بارلىق پويىزدارعا ت/ج بيلەتتەرى بار. مينيسترلىك دەرەگىنشە، نۇر-سۇلتاننان شىعاتىن پويىزدارعا جول ءجۇرۋ قۇجاتتارىنىڭ (بيلەتتەردىڭ) تاپشىلىعى جوق.
بيلەتتەر تۋرالى تولىعىراق اقپاراتتى BILET.RAILWAYS.KZ سايتىنان جانە كaspi.kz موبيلدىك قوسىمشاسىنىڭ "قتج بيلەتتەرى" بولىمشەسىنەن بىلۋگە بولادى.
پىكىر قالدىرۋ