بولارى بولىپ، بوياۋى ءسىڭىپ ۇلگىرمەگەن كەزەڭدە وتىرمىز. بوياۋ دەمەكشى، “بوياۋشى، بوياۋشى دەگەنگە ساقالىن بوياپتى” دەگەن ماتەلىمىز بار. “شاش ال دەسە، باس الادى” دەگەن دە ءبىزدىڭ ماتەل. بەكەر ايتىلماعان. عاسىرلار بويى ومىرلىك تاجىريبەدەن سۇرىپتالىپ شىققان سوزدەر.

 

پالەن مىڭ سودىر، لاڭكەس، قوعامدىق ءتارتىپ بۇزۋشى، توناۋشى-قىلمىسكەر ۇستالدى دەپ جاتىر. ەندى وسى لاڭكەسىن بولەك ءبولىپ، ءبىر قوراعا، قوعامدىق ءتارتىپتى بۇزۋشىلار مەن مارودەرلەردى ءبولىپ، بولەك قوراعا قاماپ، جازا شىعاراردا ويلانعان ابزال. “بىرەۋ قىز الىپ قاشىپتى، بىرەۋ بوسقا قاشىپتى” دەگەن دە ءبىزدىڭ ءسوز. سول تۇرعىدان قاراۋ كەرەك. البەتتە، وقيعاعا قاتىسۋشى زاڭدى بۇزىپ، قىلمىسى دالەلدەنسە، ول - ايىپتى. ءبىراق، ءار قىلمىستىڭ وزىنە ساي جازاسى بولادى ەمەس پە. دۇربەلەڭ كەزىندە كورسەقىزارلىعى ۇستاپ دۇكەنگە كىرىپ، زات ۇرلاعان نەمەسە “حالىقتىق شەرۋ ەكەن، مەن دە ءۇنى بار ازاماتپىن عوي!” دەپ كوزقاراسى ءۇشىن الاڭعا شىققانداردى ەشۋاقىتتا لاڭكەسكە تەڭەپ، وعان اۋىر جازا كەسۋ - ادىلەتتىڭ ءىسى بولمايدى. وسىعان قۇقىق قورعاۋشى، كۇشتىك ورگاندار باسا نازار اۋدارۋ كەرەك.

 

كەزىندە اتىراۋ جاقتا ءبىر سۇلتان مال ۇرلاعان 10 جىگىتتى ۇستاپ اپ، اشۋ ۇستىندە سىبىرگە ايداماقشى بولىپتى. سول كەزدە دۋاننىڭ قاريالارى سۇلتانعا بارىپ: “سەن 10 ادامدى ەمەس، 60 ادامدى يتجەكەنگە ايداتقالى وتىرسىڭ!” دەگەن ەكەن. سوندا سۇلتان: “قايداعى 60 ادام، الدارىندا 10 جىگىت تۇرعان جوق پا؟!”- دەپتى. سول كەزدە قاريالار ايتىپتى دەيدى: “مىنا تۇرعان ءار جىگىتتىڭ بەلىندە 6 بالانىڭ ۇرىعى بار. ەگەر سەن بۇلاردىڭ كوزىن قۇرتساڭ، قازاق 10 كىسىگە ەمەس، 70 كىسىگە كەميدى!”. سۇلتان اقىلدى بولماسا، نەسى سۇلتان، تەز ۇعىنا قويىپ، رايىنان قايتقان كورىنەدى. ءار 10 جىگىتكە قىلمىسىنىڭ سالماعىنا سايكەس ايىپپۇل سالىپ، قويا بەرگەن دەيدى.

 

وسىنىڭ ءبارىن نەمەنەگە تاپتىشتەپ جازىپ وتىرعانىمدى ءتۇسىنىپ وتىرعان بولارسىزدار. تالاي جاۋىنگەردەن، پوليسيا جانە قاۋىپسىزدىك قىزمەتىنىڭ وفيسەرلەرىنەن، بەيبىت تۇرعىنداردان، كىپ-كىشكەنتاي بالالاردان ايىرىلدىق. ۇلكەن تراگەديا! ولاردىڭ ورنىن ەشكىم تولتىرا المايدى. اسىرەسە اتا-انا ءۇشىن. سولاردىڭ ولىمىنە ناقتى قاتىسى بارلاردى اياۋسىز، قاتاڭ جازالاۋ كەرەك! وعان داۋ جوق! الايدا بىرەۋدىڭ اۋىر قىلمىسىن يا بولماسا بۇرىندارى اشىلماي جاتقان قىلمىستاردى جاس جىگىتتەرىمىزدىڭ مويىنىنا ىلە سالۋ بولماسىن! ءارقايسىسىنىڭ قىلمىسىن ناقتى انىقتاپ، ءىستى ءادىل جۇرگىزۋ جوعارعى بيلىكتىڭ دە، قوعامنىڭ دا باقىلاۋىندا ۇستاۋ مۇمكىن ەمەس.

 

سوندىقتان ءبىزدىڭ تەرگەۋشىلەر، وزگە دە قۇقىق قورعاۋشى ماماندار! اشۋ ۇستىندە، ارىپتەسىمنىڭ ءوشىن الام دەپ، بولماسا ءىستى تەزىرەك بىتىرەم دەپ ناۋقانشىلىققا سالىنىپ، جاس بالالارعا بىرەۋدىڭ اۋىر قىلمىسىن ناقاقتان ناقاق جابا سالۋعا جول بەرمەڭىزدەر. ادام كورمەسە دە، اللا كورىپ تۇر. سونى ۇمىتپاڭىزدار. كەز كەلگەن ادىلەتسىزدىككە - قۇداي تاراپىنان جازا بار، كەز كەلگەن ادىلەتتىلىككە - ءتاڭىر تاراپىنان ساۋاپ بار. ءارى بەرىدەن سوڭ، اردىڭ سوتى جامان. ول توزاق وتىنان دا بەتەر كۇيدىرەدى.