تالدىقورعاندا كومەندانتتىق ساعات ۋاقىتىندا ءبىر وتباسىنىڭ ءۇش ادامى مەرت بولعان. بۇل تۋرالى ەكسپرەسس ك باسىلىمى حابارلادى.
مارقۇمداردىڭ تۋىستارىنىڭ ايتۋىنشا، ولار قوناقتان ۇيىنە قايتىپ كەلە جاتقاندا كولىكتەرىنە اسكەريلەر وق اتقان. قايعىلى جاعداي 8 قاڭتار كۇنى كەشكى ساعات 21:00-دەن وتە، اقباستاۋ جانە جابايەۆ كوشەلەرىنىڭ قيىلىسىندا بولعان. ولاردىڭ دەنەسىن تۋىستارى 11 قاڭتاردا جەر قوينىنا تاپسىرعان.
– ولار دوسىنىڭ ۇيىنەن قوناقتان كەلە جاتقان. كومەندانتتىق ساعات 21:00-دەن كەشىكپەيىك دەپ ۇيىنە قاراي شىققان. ول مارقۇمداردىڭ ۇيىنەن الىس ەمەس. ارى كەتسە 2-3 مينۋتتا جەتەتىن جەر. سوعان جەتە الماي قالىپ وتىر ەمەس پە؟! اسكەريلەر اتىپ تاستاپ وتىر. كەشە جەرلەدىك. ءقازىر توقتاماعان سوڭ اتتى دەگەن اڭگىمە شىعىپ وتىر. قاراپ تۇرساڭىز توقتاتسا كەز كەلگەن ادام توقتايدى عوي. توقتاماعان كۇننىڭ وزىندە باس سالىپ وق جاۋدىرۋ دۇرىس ەمەس قوي. ۇشەۋى دە تۋرا سول جەردە ءولىپ كەتتى، – دەيدى مارقۇمداردىڭ تۋىسى رۇستەم احمەتجانوۆ.
قايعىلى جاعدايدان بەرى 4 كۇن وتسە دە مارقۇمداردىڭ تۋىستارىنا قۇزىرلى ورگان تاراپىنان ەشكىم كەلمەگەن.. رۇستەم احمەتجانوۆ ءۇش بىردەي تۋىسى ءۇشىن سوڭىنا دەيىن بارامىن دەپ وتىر.
– قۇزىرلى ورگاندارعا ارىزدانامىز. ويتكەنى اي-كۇننىڭ امانىندا ءبىر ۇيدەن ءۇش ءمايىت شىعارىپ وتىرمىز. اكىمدىكتەن، پوليسيا دەپارتامەنتىنەن ەشكىم كەلمەدى. 4 كۇن بولدى، مىنە، ەشكىمدى كورگەن جوقپىن. ءبىز بۇل جاعدايدى جىلى جاۋىپ قويمايمىز، – دەيدى رۇستەم احمەتجانوۆ.
پىكىر قالدىرۋ