ناتو رەسەيگە اسكەري اليانس قاعيداتتارى بويىنشا ىمىراعا كەلمەيتىنىن ەسكەرتتى. "ەۋروپادا جاڭا قارۋلى قاقتىعىستىڭ شىعۋ ءقاۋپى بار" دەدى ناتو باس حاتشىسى يەنس ستولتەنبەرگ.

رەسەيدىڭ ۋكراينا شيەلەنىسىن باسەڭدەتۋگە قاتىستى نەگىزگى قاۋىپسىزدىك تالاپتارىن ناتو مەن امەريكا قۇراما شتاتتارى قابىلدامادى. ءبىراق ماسكەۋمەن قارۋ-جاراقتى باقىلاۋ، زىمىرانداردى ورنالاستىرۋ جانە رەسەي-باتىس اراسىنداعى اسكەري وقيعالاردىڭ الدىن الۋ جولدارى تۋرالى بولاشاق كەلىسسوزدەر مۇمكىندىگىنە جول اشتى.

شەشىمدەر ناتو-رەسەي كەڭەسىنىڭ سارسەنبىدە وتكەن وتىرىسىندا قابىلداندى، بۇل ەكى جىلدان استام ۋاقىتتا ءبىرىنشى رەت تىركەلگەن جاعداي. باتىس نەگىزگى تالاپتاردى قابىلداماعانىنا قاراماستان رەسەي دەلەگاسياسى كەلىسسوزدەردەن باس تارتپاعانى تاراپتاردىڭ كەلىسسوزدەرىنەن ءۇمىت ۇشقىنىن بايقاتتى.  

ۆلاديمير پۋتين ۋكراينامەن قاتار (ناتو وداقتاستارى) ەستونيا، لاتۆيا جانە ليتۆا سياقتى رەسەيمەن كورشىلەس ەلدەردەن ناتو اسكەرلەرى مەن اسكەري تەحنيكاسى شىعىپ كەتۋىن قالايدى. پۋتين سونداي-اق 30 ەلدەن تۇراتىن اسكەري اليانس باسقا مۇشە ەلدەردى قابىلداماۋعا كەلىسكەنىن قۇپتايدى.

كەزدەسۋ رەسەي ۋكراينانىڭ شىعىس شەكاراسىنا جاقىن جەردە 100 000-عا جۋىق جاۋىنگەرلىك دايىن اسكەرىن، تانكى مەن اۋىر اسكەري تەحنيكاسىن جيناعانىنا بايلانىستى شاقىرىلدى.

رەسەي كورشىسىنە شابۋىل جاساۋدىڭ جاڭا جوسپارلارى بار ەكەنىن جوققا شىعارىپ، ءوز كەزەگىندە باتىستى ونىڭ قاۋىپسىزدىگىنە قاتەر ءتوندىردى دەپ ايىپتايدى.

كەزدەسۋگە ءتوراعالىق ەتكەن ناتو باس حاتشىسى يەنس ستولتەنبەرگ ناتو ەلدەرى مەن رەسەي وكىلدەرى "ديالوگتى قالپىنا كەلتىرۋ جانە بولاشاق كەزدەسۋلەر كەستەسىن زەرتتەۋ قاجەتتىگىن ءبىلدىردى" دەدى.

ءبىراق ستولتەنبەرگ ۋكراينا تۋرالى كەز كەلگەن كەلىسسوز وڭاي بولمايتىنىن ايتتى. رەسەي 2014 جىلى ۋكراينادان قىرىم تۇبەگىن اننەكسيالاپ الىپ، ۋكراينانىڭ شىعىسىنداعى سەپاراتيستەردى قولدادى. سودان بەرى ونداعى شايقاستار 14 مىڭنان استام ادامنىڭ ءومىرىن قيدى.

ستولتەنبەرگ جۋرناليستەرگە رەسەي سىرتقى ىستەر ءمينيسترىنىڭ ورىنباسارى الەكساندر گرۋشكو جانە قورعانىس ءمينيسترىنىڭ ورىنباسارى الەكساندر فومينمەن "وتە بايىپتى جانە تىكەلەي پىكىر الماسۋ" بولعاننان كەيىن ۋكراينانىڭ ناتو-عا قوسىلۋ مۇمكىندىگىنە قاتىستى "ناتو وداقتاستارى مەن رەسەي اراسىندا بۇل ماسەلەدە ايتارلىقتاي قايشىلىقتار بار" دەدى.

"ەۋروپادا جاڭا قارۋلى قاقتىعىستىڭ شىعۋ ءقاۋپى بار" دەپ قوستى ستولتەنبەرگ.

ستولتەنبەرگ ۋكراينانىڭ بولاشاق قاۋىپسىزدىك شارالارىن شەشۋگە قۇقىعى بار ەكەنىن، ناتو جاڭا مۇشەلەر قابىلداۋدى جالعاستىراتىنىن جانە ءپۋتيننىڭ اسكەري ۇيىم كەڭەيۋىن توقتاتۋ تۋرالى نەگىزگى تالابىن قابىلدامايتىنىن اتاپ ءوتتى.

"باسقا ەشكىمنىڭ ايتار ءسوزى جوق جانە ارينە، رەسەيدە ۆەتو قۇقىعى جوق" دەدى ول.