بۇرىنعى پرەزيدەنت نۇرسۇلتان نازاربايەۆتىڭ كۇيەۋ بالاسى، ميللياردەر تيمۋر قۇلىبايەۆ ءبىر اي بۇرىن "قازازوت" اكسيونەرلىك قوعامىنداعى ءوزىنىڭ بارلىق اكسيالارىن ساتىپ جىبەرگەن. اقپاراتتى كومپانيانىڭ باسپا ءسوز قىزمەتى حابارلادى.

"قازازوت" اق جاي اكسيالارىن ساتىپ الۋ بويىنشا مامانداندىرىلعان ساۋدا-ساتتىق 2021 جىلعى 10 جەلتوقساندا ءوتتى. بەلسەندى وتىنىمدەردىڭ كولەمى 85 مىڭ جاي اكسيانى قۇرادى. بەرىلگەن وتىنىمدەر بويىنشا ورتاشا الىنعان باعا 788 858،82 تەڭگە. ساۋدا-ساتتىق قورىتىندىسى بويىنشا اكسيونەرلىك قوعامنىڭ قاراپايىم اكسيالارىنىڭ 85%-ىن "Kazakhstan Petrochemicals" ج ش س ساتىپ الدى، 15%-ى بۇرىنعى يەسى باحاريدين ابلازيموۆتا قالدى. وسىلايشا ءوز اكسيالارىن "Joint Resources" اق (100% تيمۋر قۇلىبايەۆقا تيەسىلى – رەد)، دىنمۇحامەد ىدىرىسوۆ پەن ەرجان دوستىبايەۆ ساتتى" دەلىنگەن حابارلامادا.

تيمۋر قۇلىبايەۆ بۇگىن "اتامەكەن" ۇلتتىق كاسىپكەرلەر پالاتاسى ءتوراعاسى قىزمەتىنەن كەتكەن. ول نۇرسۇلتان نازاربايەۆتىڭ ورتانشى قىزى دينارا نازاربايەۆانىڭ كۇيەۋى.

15 قاڭتاردا نازاربايەۆتىڭ تاعى ەكى كۇيەۋ بالاسى – "قازترانسويل" اق باسقارما ءتوراعاسى ديماش دوسانوۆ پەن "قازترانسگاز" ۇك" اق باسقارما ءتوراعاسى قايرات شارىپبايەۆ قىزمەتتەرىنەن بوساتىلعان .

ديماش دوسانوۆ – نۇرسۇلتان نازاربايەۆتىڭ كىشى قىزى ءاليا نازاربايەۆانىڭ، ال قايرات شارىپبايەۆ – ۇلكەن قىزى داريعا نازاربايەۆانىڭ كۇيەۋى.