پرەزيدەنت قاسىم-جومارت توقايەۆ بەرىك يماشيەۆتى ورتالىق سايلاۋ كوميسسياسىنىڭ ءتوراعاسى قىزمەتىنەن بوساتتى. بۇل تۋرالى مەملەكەت باسشىسىنىڭ باسپا ءسوز حاتشىسى بەرىك ءۋالي حابارلادى.

"مەملەكەت باسشىسىنىڭ جارلىعىمەن بەرىك ءماجيت ۇلى يماشيەۆ قازاقستان رەسپۋبليكاسى ورتالىق سايلاۋ كوميسسياسىنىڭ ءتوراعاسى لاۋازىمىنان بوساتىلدى" دەلىنگەن حابارلامادا.

بەرىك يماشيەۆ 1960 جىلى 7 ماۋسىمدا الماتى قالاسىندا دۇنيەگە كەلگەن. 1982 جىلى لومونوسوۆ اتىنداعى ممۋ "زاڭگەر" ماماندىعى بويىنشا بىتىرگەن.

2000-2001 جىلدارى تابيعي مونوپوليالاردى رەتتەۋ، باسەكەلەستىكتى قورعاۋ جانە شاعىن بيزنەستى قولداۋ جونىندەگى اگەنتتىكتىڭ ءتوراعاسى بولىپ جۇمىس ىستەدى. 2001-2003 جىلدارى - استانا قالاسىنىڭ ادۆوكاتتار القاسىنىڭ مۇشەسى. وسك باسشىسى بولىپ 2016 جىلدىڭ قىركۇيەگىنەن باستاپ جۇمىس ىستەدى. 2003-2005 جىلدارى قازاقستان قاۋىپسىزدىك كەڭەسى حاتشىسىنىڭ ورىنباسارى بولىپ جۇمىس ىستەدى. 2005-2007 جىلدارى - پرەزيدەنت اكىمشىلىگى باسشىسىنىڭ ورىنباسارى. 2007-2008 جىلدارى قازاقستان رەسپۋبليكاسى قاۋىپسىزدىك كەڭەسىنىڭ حاتشىسى بولدى. 2008-2012 جىلدارى - پارلامەنت سەناتىنىڭ دەپۋتاتى، كونستيتۋسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتىنىڭ ءتوراعاسى. 2012 جىلدان 2016 جىلعا دەيىن ادىلەت ءمينيسترى قىزمەتىن اتقاردى.

بەرىك يماشيەۆ سەناتور ەكس-پرەزيدەنت نۇرسۇلتان نازاربايەۆتىڭ قۇداسى. ن.نازاربايەۆتىڭ جيەنى نۇرالي الييەۆ بەرىك يماشيەۆتىڭ قىزى ايدا يماشيەۆانى العان.

ەلدەگى جاپپاي تارتىپسىزدىككە ۇلاسقان حالىق نارازىلىعى كەزىندە قاۋىپسىزدىك كەڭەسى پرەزيدەنتكە وتكەلى قازاقستاننىڭ ەكس-پرەزيدەنتى نۇرسۇلتان نازاربايەۆتىڭ جاقىن ادامدارى قىزمەتتەن شەتتەتىلىپ جاتىر.

بۇعان دەيىن نازاربايەۆتىڭ ورتانشى كۇيەۋ بالاسى تيمۋر قۇلىبايەۆ "اتامەكەن" ۇلتتىق كاسىپكەرلەر پالاتاسى ءتوراعاسى قىزمەتىنەن كەتكەن.

سونداي-اق پرەزيدەنت نازاربايەۆتىڭ نەمەرە ءىنىسى سامات ءابىش ۇقك ءتوراعاسىنىڭ ءبىرىنشى ورىنباسارى قىزمەتىنەن بوساتىلدى.

15 قاڭتاردا نازاربايەۆتىڭ تاعى ەكى كۇيەۋ بالاسى – "قازترانسويل" اق باسقارما ءتوراعاسى ديماش دوسانوۆ پەن "قازترانسگاز" ۇك" اق باسقارما ءتوراعاسى قايرات شارىپبايەۆ قىزمەتتەرىنەن بوساتىلعان.

ديماش دوسانوۆ – قازاقستاننىڭ بۇرىنعى پرەزيدەنتى نۇرسۇلتان نازاربايەۆتىڭ كىشى قىزى ءاليا نازاربايەۆانىڭ، ال قايرات شارىپبايەۆ – ۇلكەن قىزى داريعا نازاربايەۆانىڭ كۇيەۋى.

18 قاڭتاردا قتج – جۇك تاسىمالى باس ديرەكتورىنىڭ ەكونوميكا جانە قارجى جونىندەگى ورىنباسارى ءالجان يماشيەۆ قىزمەتىنەن كەتكەن بولاتىن. ول بەرىك يماشيەۆتىڭ ۇلى.