تاۋەلسىز قازاقستان تاريحىنداعى ەڭ ءىرى قاندى قاقتىعىستان كەيىن ەل پرەزيدەنتى قاسىم-جومارت توقايەۆتىڭ تاپسىرماسى بويىنشا قۇرىلعان «قازاقستان حالقىنا» قورىنىڭ ءتورت قۇرىلتايشىسى بار. ءبىرىنشىسى – «قوعامدىق باقىلاۋ جانە مونيتورينگ» رەسپۋبليكالىق قوعامدىق بىرلەستىگى، ەكىنشىسى – «مەنىڭ اتامەكەنىم» قوعامدىق بىرلەستىگى، ءۇشىنشىسى – ەلميرا الييەۆا، ءتورتىنشىسى – باقىت بايعالييەۆا.
«قازاقستان حالقىنا» قورى تۋرالى رەسمي انىقتاما. ەلەكتروندى ۇكىمەت پورتالىنان جاسالعان سكرينشوت
قورعا قۇرىلتايشىلىق ەتەتىن ەكى قوعامدىق بىرلەستىك تە مەملەكەتتىك ەمەس.
اشىق دەرەكوزدەردەگى اقپاراتتان توقايەۆ قۇرعان قور قۇرىلتايشىلارىنىڭ ءبىرى – «مەنىڭ اتامەكەنىم» قوعامدىق بىرلەستىگى ەكس-پرەزيدەنت نۇرسۇلتان نازاربايەۆتىڭ كۇيەۋ بالاسى، كاسىپكەر تيمۋر قۇلىبايەۆقا قاتىسى بار ەكەنىن اڭعارۋعا بولادى.
ەكس-پرەزيدەنت نۇرسۇلتان نازاربايەۆتىڭ كۇيەۋ بالاسى، كاسىپكەر تيمۋر قۇلىبايەۆ/فوتو: Olympic.kz
بۇل قوعامدىق بىرلەستىك 2018 جىلى 17 مامىردا قۇرىلعان. ۇيىم باسشىسى – ءلاززات شىڭعىسبايەۆا دەگەن ازامات.
44 جاستاعى شىڭعىسبايەۆا «مەنىڭ اتامەكەنىم» قوعامدىق بىرلەستىگىنەن بولەك، تاعى ەكى ۇيىمدى باسقارادى. ونىڭ ءبىرى – الماتى وبلىستىق كاسىپكەرلەر پالاتاسى، ەكىنشىسى – «ادال» پارتياسىنىڭ الماتى وبلىسىنداعى فيليالى.
شىڭعىسبايەۆا باسقاراتىن الماتى وبلىستىق كاسىپكەرلەر پالاتاسى – تيمۋر قۇلىبايەۆ بىرنەشە جىل بويى ءتورالقالىعىن باسقارعان «اتامەكەن» ۇلتتىق كاسىپكەرلەر پالاتاسىنا تىكەلەي باعىنىشتى ۇيىم. دەمەك، شىڭعىسبايەۆا قۇلىبايەۆتىڭ قاراماعىندا جۇمىس ىستەپ جۇرگەن ادام دەۋگە تولىق نەگىز بار.
مۇنان بولەك، شىڭعىسبايەۆا وبلىستىق فيليالىنا جەتەكشىلىك ەتەتىن «ادال» پارتياسىنىڭ دا تيمۋر قۇلىبايەۆقا قاتىسى بارى قوعامدا ءجيى ايتىلادى. بۇل پارتيا 2020 جىلدىڭ قاراشاسىنا دەيىن «بىرلىك» دەپ اتالدى. ەلدەگى كەيىنگى پارلامەنت سايلاۋىنىڭ الدىندا پارتيا اتاۋى «ادال» دەپ وزگەرىپ، سايلاۋالدى ناۋقاندا ساياسي ۇيىم بەلسەندى ناسيحات جۇرگىزدى، ءبىراق ماجىلىسكە وتە العان جوق. سول كەزدە بۇل پارتيانى نازاربايەۆتىڭ كۇيەۋ بالاسى قۇلىبايەۆ ساتىپ العانى ايتىلعان.
شىڭعىسبايەۆا باسقاراتىن «مەنىڭ اتامەكەنىم» قوعامدىق بىرلەستىگى «قازاقستان حالقىنا» دەپ اتالاتىن قور قۇرىلتايشىلارىنىڭ ءبىرى ەكەنىن جوعارىدا ايتتىق. ال بۇل بىرلەستىكتىڭ ءوزىنىڭ 11 قۇرىلتايشىسى بار. الايدا ەلەكتروندى ۇكىمەت پورتالىندا 11 قۇرىلتايشىنىڭ بىرەۋى جاسىرىلعان. قالعان ونى مىنالار: مادەنيەت بوجبانوۆ، قاينار اباسوۆ، تالعات جۇماتوۆ، رايحانگۇل ساتابايەۆا، جاننا تەلپەكبايەۆا، ەرمەك دۇيسەنحانوۆ، جاندار سادىقوۆ، شۇعا ناۋرىزبايەۆا، الەنا گۋليايەۆا جانە ەلدوس ۇشكەمروۆ. بۇل ادامداردىڭ ءبىرازى قۇلىبايەۆتىڭ باقىلاۋىندا بولعان «اتامەكەن» كاسىپكەرلەر پالاتاسىندا جۇمىس ىستەگەن.
«مەنىڭ اتامەكەنىم» قوعامدىق بىرلەستىگى تۋرالى رەسمي انىقتاما. ەلەكتروندى ۇكىمەت پورتالىنان جاسالعان سكرينشوت
ينتەرنەتتەگى اقپاراتقا قاراعاندا، «مەنىڭ اتامەكەنىم» قوعامدىق بىرلەستىگى قۇرىلعالى بەرى قايىرىمدىلىقپەن اينالىسىپ كەلە جاتىر. ۇيىم ءۇش جىلدا 3،7 ملن تەڭگە سالىق تولەگەن. ءبىر قىزىعى، بۇل بىرلەستىكتىڭ قۇرىلتايشىلارى «قازاقستان حالقىنا» دەگەن قور رەسمي تىركەلگەن كۇنى، ياعني، 14 قاڭتاردا وزگەرگەن. ءبىراق ەلەكتروندى ۇكىمەت پورتالىنان 14 قاڭتارعا دەيىن بۇل بىرلەستىكتىڭ قۇرىلتايشىلارى كىم بولعانىن كورۋ مۇمكىن ەمەس.
«قازاقستان حالقىنا» قورىنىڭ قالعان تاعى ءبىر قۇرىلتايشىسى – «قوعامدىق باقىلاۋ جانە مونيتورينگ» رەسپۋبليكالىق قوعامدىق بىرلەستىگى 2020 جىلى 28 جەلتوقساندا قۇرىلعان. سودان بەرى ۇيىم 94 مىڭ تەڭگە سالىق تولەگەن. بىرلەستىكتىڭ ناقتى نەمەن اينالىساتىنى بەلگىسىز. باسشىسى – سايدا تاۋكەليەۆا. بىرلەستىكتىڭ 10 قۇرىلتايشىسى بار.
«قوعامدىق باقىلاۋ جانە مونيتورينگ» رەسپۋبليكالىق قوعامدىق بىرلەستىگى تۋرالى رەسمي انىقتاما. ەلەكتوروندى ۇكىمەت پورتالىنان جاسالعان سكرينشوت
پرەزيدەنت تاپسىرماسى بويىنشا قۇرىلعان قوردىڭ قالعان ەكى قۇرىلتايشىسى جەكە ادامدار. ولار: «ورفاندىق اۋرۋلارى بار پاسيەنتتەرگە كومەك كورسەتۋ قاۋىمداستىعى» ءتورايىمى باقىت بايعالييەۆا مەن «Help Today» قايىرىمدىلىق قورىنىڭ ءتورايىمى ەلميرا الييەۆا.
پرەزيدەنت توقايەۆ «قازاقستان حالقىنا» قورى قۇرىلاردا «ءبىرىنشى پرەزيدەنت – «ەلباسىنىڭ» ارقاسىندا وتە تابىستى كومپانيالار مەن حالىقارالىق دەڭگەيدەگى باي ادامداردىڭ توبى پايدا بولدى. حالىققا تيەسىلى بايلىقتى حالىققا بەرەتىن، جۇيەلى تۇردە كومەكتەسەتىن ۋاقىت كەلدى. ۇكىمەت كومپانيالاردى انىقتاپ، ولارمەن «قازاقستان حالقىنا» قورىنا اۋداراتىن سالىمدارىن انىقتاۋى ءتيىس» دەگەن بولاتىن.
توقايەۆتىڭ بۇل ءسوزى قور حالىققا كومەك كورسەتۋ ماقساتىندا قۇرىلعانىن اڭعارتادى. ءبىراق قور قۇرىلتايشىلارى رەتىندە نە سەبەپتى جەكە ادامدار مەن مەملەكەتتىك ەمەس ۇيىمدار تاڭدالعانى تۇسىنىكسىز.
«قازاقستان حالقىنا» دەپ اتالاتىن قور قۇرىلعان سوڭ ونىڭ 14 ادامنان تۇراتىن قامقورشىلىق كەڭەسىنىڭ قۇرامى جاريالانعان ەدى. الايدا سول ون تورتتىكتىڭ اراسىنان قوردىڭ رەسمي قۇرىلتايشىلارى قاتارىندا قامقورشىلىق كەڭەسىنىڭ ءتورت مۇشەسى – سايدا تاۋكەليەۆا («قوعامدىق باقىلاۋ جانە مونيتورينگ» قب)، ءلاززات شىڭعىسبايەۆا («مەنىڭ اتامەكەنىم» قب)، باقىت بايعالييەۆا جانە ەلميرا الييەۆا عانا بار. قامقورشىلىق كەڭەسىنىڭ مۇشەسى رەتىندە اتالعان قالعان 10 ادام رەسمي تۇردە قوردىڭ قۇرىلتايشىسى اتاناتىن-اتانبايتىنى بىزگە بەلگىسىز. جالپى، حالىق يگىلىگى ءۇشىن اشىلعان قوردىڭ قۇرىلتايشىلارى نە سەبەپتى جەكە ادامدار مەن مەملەكەتتىك ەمەس ۇيىمدار بولعانى وتە تۇسىنىكسىز.
پىكىر قالدىرۋ