الماتى قالاسى كاسىپكەرلىك جانە ينۆەستيسيالار باسقارماسى كەي ازىق-تۇلىك تاۋارلارىنىڭ باعاسىن رەتتەۋ شارالارى جۇرگىزىلىپ جاتقانىن مالىمدەدى.
باسقارما اقپاراتىنشا، جەڭىلدىكپەن نەسيەلەۋ باعدارلاماسى اياسىندا باعانى رەتتەپ، 60 كۇنگە ءسابىز باعاسىن كەلىسىنە 161 تەڭگە، كۇنباعىس مايىنىڭ ءليترىن 791 تەڭگەدەن بەلگىلەۋ ماسەلەسى قاراستىرىلىپ جاتىر.
جەڭىلدەتىلگەن نەسيە "ماگنۋم" (5،7 ملرد تەڭگە)، "تويمارت" (430 ملن تەڭگە) جەلىلەرىنە، جۇمىرتقا وندىرۋمەن اينالىساتىن "الساد" (800 ملن تەڭگە)، ەت ساتاتىن "اسىل ەت" (88 ملن تەڭگە) كومپانيالارىنا بەرىلگەن.
وسىعان بايلانىستى ساۋدا جەلىلەرىندە كەي تاۋار تۇرلەرىنە تومەندەگىدەي شەكتى باعا بەلگىلەندى.
"ماگنۋمدا" اي سوڭىنا دەيىن:
- كارتوپ – كيلوگراممى 119 تەڭگە؛
- ءسابىز – كيلوگراممى 128 تەڭگە؛
- پياز – كيلوگراممى 86 تەڭگە؛
- قىرىققابات – كيلوگراممى 117 تەڭگە.
30 ساۋىرگە دەيىن "تويمارتتا":
- كارتوپ – كيلوگراممى 199 تەڭگە؛
- پياز – كيلوگراممى 89 تەڭگە.
بۇدان بولەك قالانىڭ كوك بازار، جاڭا بۇلاق، سارى-ارقا، تاستاق، تاۋسامالى، الماتى-1، تۇركىسىب جارمەڭكەسى سەكىلدى بازارلارىندا الەۋمەتتىك سورەلەر اشىلعان. ول جەردە كارتوپ، ءسابىز، پياز، قىرىققابات، قانت، قاراقۇمىق، كۇنباعىس مايى، كۇرىش، كەسپە، ۇن تومەندەتىلگەن باعامەن ساتىلادى.
سونداي-اق جۇلدىز، وربيتا، تاۋسامالى، ارىستان، تاستاق بازارلارىندا ەت سورەلەرى ىستەپ تۇر. ول جەرلەردە سيىردىڭ ءتوس جانە قول ەتتەرىنىڭ كەلىسى 2050 تەڭگەدەن بەلگىلەنگەن.
"الماتىنان" ناۋبايحاناسىمەن جاسالعان مەموراندۋم ناتيجەسىندە بولكە نان باعاسىنىڭ باستاپقى جىبەرىلەتىن باعاسى 85 تەڭگە كولەمىندە بەلگىلەنسە، ءسۇت ونىمدەرىن ساتاتىن "JLC" دۇكەندەر جەلىسىمەن 130 ساۋدا نۇكتەسىندەگى باعانى ارزانداتۋ تۋرالى كەلىسسوز جۇرگىزىلگەن.
پىكىر قالدىرۋ