پرەزيدەنت قاسىم-جومارت توقايەۆ "Nur Otan" پارتياسىنىڭ كەزەكتەن تىس XXI سەزىندە الداعى وزگەرىستەر تۋرالى ايتىپ، ەكس-پرەزيدەنتتىڭ ەڭبەگىن اتاپ ءوتتى.

– قوعامدىق قۇندىلىقتار جۇيەسىنە، ساياسي جانە الەۋمەتتىك-ەكونوميكالىق سالالارعا تۇبەگەيلى وزگەرىس ەنگىزۋ قاجەت. وسى رەتتە، ازاماتتىق قوعام ينستيتۋتتارىنا زور مىندەت جۇكتەلەدى. اسىرەسە، ساياسي پارتيالار ايرىقشا ءرول اتقارادى. ءقازىر ەل ىشىندە ءتۇرلى جاعىمسىز اڭگىمەلەر تاراپ جاتقانىن بىلەمىن. وسىعان بايلانىستى مەملەكەت باسشىسى رەتىندە تاعى دا قايتالاپ ايتامىن. تۇڭعىش پرەزيدەنتىمىز ەلىمىزدى ىرگەسى بەرىك مەملەكەتكە اينالدىرۋ ءۇشىن زور ەڭبەك ءسىڭىردى. ءبىز بۇعان دەيىنگى جەتىستىكتەرىمىزدەن ايىرىلىپ قالماۋىمىز كەرەك. مەملەكەتىمىزدى نىعايتىپ، كەز-كەلگەن سىناققا دايىن بولۋىمىز قاجەت. تابىسقا جەتۋ ءۇشىن، ەڭ الدىمەن، اۋىزبىرشىلىك كەرەك ەكەنىن ەستە ۇستايىق، – دەدى ول پارتيا سەزىندە.

ق.توقايەۆ ن.نازاربايەۆتىڭ تاريحي ەڭبەگىن ۇمىتپاۋعا شاقىرىپ "وتكەن زاماندى جوققا شىعاراتىن، ءوز باسشىلارىنا شابۋىل جاسايتىن حالىقتىڭ بولاشاعى ەكىتالاي ءارى بۇلىڭعىر" دەدى.

سونداي-اق ول پرەزيدەنت پەن كەز كەلگەن پارتيا جانە قوزعالىس اراسىنداعى ديستانسيا بولۋى كەرەكتىگىن اتاپ ءوتىپ، بەلگىلى ءبىر ۋاقىتتان كەيىن Nur Otan-داعى ءتوراعالىعىنىڭ ءمان-ماڭىزى قايتا قارالاتىنىن جەتكىزدى.

سونىمەن قاتار توقايەۆ الداعى رەفورمالاردى ساپالى تۇردە زاڭنامالىق تۇرعىدا قامتاماسىز ەتۋ ءۇشىن پارتيانىڭ ماجىلىستەگى فراكسياسىن جاڭعىرتۋ كەرەكتىگىنە نازار اۋداردى.

– فراكسيا مۇشەلەرى فورماليزمنەن الىس بولىپ، قاتىپ قالعان قالىپتان شىعۋى كەرەك. قوعام وكىلدەرىمەن كوبىرەك بايلانىس ورناتۋى قاجەت، – دەدى پرەزيدەنت.

♦ توقايەۆ "Nur Otan"-نىڭ ماجىلىستەگى فراكسياسى جاڭعىرتىلاتىنىن ايتتى