1986 جىلعى جەلتوقسان وقيعاسىنا قاتىسۋشىلار قاڭتاردا بەيبىت ميتينگىگە شىققان قاماۋداعى بارلىق ازاماتتاردى بوساتۋدى تالاپ ەتتى. ۇندەۋدىڭ ۆيدەوسى Facebook جەلىسىندە جاريالاندى.  

جەلتوقسانشىلار وسىدان 35 جىل بۇرىن قىزىل يمپەريانىڭ سولاقاي ساياساتىنا قارسى شىققان جاستاردىڭ قاتارىندا بولعانى ايتادى. سوزدەرىنشە، ىشكى ىستەر مينيسترلىگى مەن ۇقك 1986 جىلى دا وكىلەتتىگىن اسىرا پايدالانىپ، "نەشە ءتۇرلى ارەكەتتەر ويلاستىرىپ"، ىستەلمەگەن قىلمىستى بەيبىت جاستاردىڭ موينىنا ىلگەن.

"بىزگە ۇلتشىلدار، ناشاقورلار، ماسكۇنەمدەر، بۇزاقىلار دەپ جالا جاۋىپ، دۇنيەجۇزىنە ماسقارالاپ، الدىن اتۋ جازاسىنا كەسىپ، كەيىنگىلەردى 10-15 جىلعا سوتتادى"، - دەلىنگەن ۇندەۋدە.

بەلسەندىلەر قاڭتار وقيعاسى كەزىندە بەيبىت شەرۋگە شىققاندار جازىقسىز جازالانىپ، تۇرمەگە قامالىپ جاتقانىن مالىمدەدى.

"تۇرمەدە ولاردى ازاپتاپ، زورلىق-زومبىلىق كورسەتىپ، ىستەمەگەن قىلمىستى موينىنا ءىلىپ وتىر. بۇل جونىندە بۇكىل الەم ايتىپ جاتىر. قۇزىرلى ورگان قىزمەتكەرلەرى ءوز وكىلەتتىگىن اسىرا پايدالانۋدا. ءتىپتى ءتۇرلى جاراقاتپەن اۋرۋحانادا جاتقان ناۋقاستاردى الىپ شىعىپ، كۇش قولدانىپ، كىنا تاعۋدا. ول ەشقانداي ادامگەرشىلىككە جاتپايدى. بۇگىنگى كۇنى قاڭتار كوتەرىلىسىنە قاتىسقان جاستارعا قارسى قولدانىلىپ جاتقان ايۋاندىق ارەكەتتەر 1986 جىلعى رەپرەسسيادان 100 ەسە اسىپ كەتتى. ەلىم، جەرىم دەپ بەيبىت شەرۋگە شىققان حالىق ەشقانداي تەرروريست ەمەس. ءبىز، جەلتوقسان ارداگەرلەرى ەلىمىزدىڭ تۇرمەلەرىندە بولىپ جاتقان ايۋاندىقتى شۇعىل تۇردە توقتاتىپ، ولاردى بوستاندىققا شىعارۋدى تالاپ ەتەمىز"، - دەپ مالىمدەدى ولار.