الماتى قالاسىنىڭ اكىمى باقىتجان ساعىنتايەۆ قىزمەتىنەن كەتىپ، ونىڭ ورنىنا ەربولات دوسايەۆ تاعايىندالدى. اقپاراتتى پرەزيدەنتتىڭ باسپا ءسوز حاتشىسى بەرىك ءۋالي رەسمي تۇردە راستادى.
"مەملەكەت باسشىسىنىڭ جارلىعىمەن باقىتجان ءابدىر ۇلى ساعىنتايەۆ الماتى قالاسىنىڭ اكىمى لاۋازىمىنان باسقا جۇمىسقا اۋىسۋىنا بايلانىستى بوساتىلدى؛ مەملەكەت باسشىسىنىڭ جارلىعىمەن ەربولات اسقاربەك ۇلى دوسايەۆ الماتى قالاسىنىڭ اكىمى قىزمەتىنە تاعايىندالدى. ول قازاقستان رەسپۋبليكاسى ۇلتتىق بانكىنىڭ ءتوراعاسى لاۋازىمىنان بوساتىلدى" دەلىنگەن اقپاراتتىق حابارلامادا.
باقىتجان ساعىنتايەۆ الەۋمەتتىك جەلىدە قىزمەتتەن كەتۋىنە بايلانىستى جازبا جاريالاپ، ءوزىنىڭ تۇسىندا اتقارىلعان، باستالعان ىستەر تۋرالى قىسقا ايتىپ ءوتتى.
"بۇگىن مەن ءوز لاۋازىمىمدى جاڭا اكىمگە تاپسىرامىن. وسىدان تۋرا 720 كۇن بۇرىن پرەزيدەنت ماعان الماتى اكىمدىگىن باسقارۋدى سەنىپ تاپسىردى. بۇل ءۇشىن مەملەكەت باسشىسىنا ريزامىن.
مەن سىزدەرمەن ۇنەمى بىرگە بولدىم. قالا ءومىرىن جاقسارتۋعا بار كۇش-جىگەرىمدى ارنادىم. ۇزاق مەرزىمدى "الماتى-2050" ستراتەگياسىن قابىلداپ، قالانى دامىتۋدىڭ كەلەشەگىن ايقىندادىق. پرەزيدەنتتىڭ "شەتسىز قالا" قاعيداتى نەگىزىندە قالاعا قوسىلعان اۋدانداردىڭ تۇيتكىلدى ماسەلەلەرىن شەشۋگە باسا نازار اۋدارىپ، "جاڭا الماتى" كەشەندى باعدارلاماسىن قابىلدادىق.
ءبىز الەۋمەتتىك ماسەلەلەردى شەشۋ ءۇشىن الماتىنى اگلومەراسيا رەتىندە دامىتۋ جانە وبلىستىڭ قالامەن شەكتەسەتىن 4 اۋدانىندا جۇمىس ورىندارىن قۇرۋ جۇمىسىن كۇن تارتىبىنە قويدىق. دەنساۋلىق ساقتاۋ جۇيەسى نىعايتىلدى. ءبىر جىلدىڭ ىشىندە ەڭ زاماناۋي جابدىقتارمەن جابدىقتالعان 3 جۇقپالى اۋرۋلار اۋرۋحاناسىن ىسكە قوستىق. پاندەميا كەزىندە دەنساۋلىق ساقتاۋ جۇيەسىندەگى داعدارىسقا جول بەرىلمەدى.
مەكتەپتەردى جەدەل سالۋ باعدارلاماسىن قولعا الدىق. تەك 2021 جىلى 33 جاڭا مەكتەپ سالىندى. بۇل – مەكتەپتەردەگى ورىن تاپشىلىعىن ازايتۋعا باعىتتالعان تۇبەگەيلى قادام بولدى. ەكولوگيانى جاقسارتۋ ءۇشىن جۇيەلى ەكى شەشىم قابىلداندى: ميلليون اعاش وتىرعىزۋ جانە ەكىنشى جەو-نى گازعا اۋىستىرۋ.
مەنىڭ ءاربىر جۇمىس كۇنىم سىزدەردىڭ كوز الدىلارىڭىزدا ءوتتى. وزدەرىڭىزبەن ءاردايىم كەزدەسىپ، اقىلداسىپ وتىردىق. اپتا سايىن Akimat Live تىكەلەي ەفيرىنە شىقتىم. اتقارىلعان شارالار تۋرالى ۇنەمى حاباردار بولدىڭىزدار. بىرگە اتقارىلعان جۇمىس ءۇشىن الماتىلىقتارعا العىس ايتامىن!
قالامىزعا جانە بارشا الماتىلىقتارعا باقىتتى عۇمىر تىلەيمىن! الماتى ماڭگى مەنىڭ جۇرەگىمدە" دەلىنگەن ساعىنتايەۆ جازباسىندا.
ءتۇرلى دەرەككوزدەر باقىتجان ساعىنتايەۆتىڭ قىزمەتىنەن كەتىپ، ونىڭ ورنىنا ەربولات دوسايەۆ كەلەتىنى تۋرالى كۇنى بۇرىن جازعان بولاتىن.
پىكىر قالدىرۋ