"Nur Otan" پارتياسىنىڭ ءتوراعاسى قاسىم-جومارت توقايەۆتىڭ قاۋلىسىمەن پارتيانىڭ اتقارۋشى حاتشىسى بولىپ اسحات ورالوۆ تاعايىندالدى.
اسحات ورالوۆ 1990 جىلدىڭ 10 اقپانىندا پاۆلودار وبلىسىنىڭ اقسۋ قالاسىندا دۇنيەگە كەلگەن. ول ل.ن.گۋميليەۆ اتىنداعى ەۇۋ-نى "اۋدارما ءىسى" جانە "حالىقارالىق قاتىناستار" ماماندىعى بويىنشا بىتىرگەن.
2013-2016 جىلدارى ەۋرازيا ۇلتتىق ۋنيۆەرسيتەتىنىڭ حاتتامات ءبولىمىنىڭ باس مامانى، 2014-2016 جىلدارى "نۇر وتان" پارتياسىنىڭ "نۇر" فيليالى ءتوراعاسىنىڭ ءبىرىنشى ورىنباسارى، 2016-2017 جىلدارى استانا قالاسى جاستار ساياساتى ماسەلەلەرى باسقارماسى" مم باسشىسىنىڭ م.ا، 2017-2018 جىلدارى "استانا قالاسى جاستار ساياساتى ماسەلەلەرى باسقارماسىنىڭ" باسشىسى بولعان.
2018 جىلدىڭ قاڭتار-تامىز ايلارى ارالىعىندا ءدىن ىستەرى جانە ازاماتتىق قوعام مينيسترلىگى جاستار ساياساتى دەپارتامەنتىن باسقارعان.
2018-2019 جىلدارى قوعامدىق دامۋ مينيسترلىگى جاستار جانە وتباسى ىستەرى كوميتەتى ءتوراعاسىنىڭ ورىنباسارى، 2019-2020 جىلدارى پاۆلودار وبلىسى اكىمىنىڭ ورىنباسارى، 2020-2021 جىلدارى اقپارات جانە قوعامدىق دامۋ مينيسترلىگىنىڭ ۆيسە-مينيسترى قىزمەتتەرىن اتقارعان. 2021 جىلى شىلدەدە نۇر-سۇلتان قالاسى اكىمىنىڭ ورىنباسارى بولىپ تاعايىندالعان.
بۇگىن بۇعان دەيىن وسى قىزمەتتى اتقارعان باۋىرجان بايبەك قىزمەتىنەن كەتكەن.
28 قاڭتاردا وتكەن پارتيانىڭ كەزەكتەن تىس سەزىندە پرەزيدەنت توقايەۆ "Nur Otan" پارتياسىنىڭ ءتوراعاسى اتانىپ، پارتيا ءتوراعاسىنىڭ ءبىرىنشى ورىنباسارى لاۋازىمىنىڭ ورنىنا حاتشى لاۋازىمىن ەنگىزۋ قاجەتتىگىن ايتقان.
پىكىر قالدىرۋ