ۇلتتىق قاۋىپسىزدىك كوميتەتىنىڭ قۇرىلىمى قايتا قۇرىلادى. بۇل تۋرالى ۆەدومستۆونىڭ رەسمي سايتىندا حابارلاندى.
"مەملەكەت باسشىسىنىڭ 11 قاڭتاردا پارلامەنت ءماجىلىسىنىڭ جالپى وتىرىسىندا جانە 27 قاڭتاردا قاۋىپسىزدىك كەڭەسىنىڭ وتىرىسىندا بەرگەن تاپسىرمالارىن ورىنداۋ ءۇشىن ۇلتتىق قاۋىپسىزدىك كوميتەتى ۆەدومستۆونىڭ قىزمەتىن قايتا رەفورمالاۋ جۇمىستارىن باستادى" دەلىنگەن حابارلامادا.
ۆەدومستۆودا ۇقك ورگاندارىنىڭ، ونىڭ ىشىندە شەكارا قىزمەتى مەن "ا" ارنايى ماقساتتاعى قىزمەتىنىڭ قۇرىلىمىن، مىندەتتەرى مەن فۋنكسيالارىن باعالاۋ جانە وڭتايلاندىرۋ بويىنشا ارنايى جۇمىس توبىن قۇرۋ تۋرالى ايتىلدى.
"تەرروريزمگە، ترانسۇلتتىق ۇيىمداسقان قىلمىسقا جانە حالىقارالىق ەسىرتكى بيزنەسىنە قارسى كۇرەس، سونداي-اق ەكونوميكالىق قاۋىپسىزدىكتى قامتاماسىز ەتۋ بولىمشەلەرىنىڭ قىزمەتىن قايتا قۇرۋ جانە نىعايتۋ ماسەلەلەرى اتاپ ءوتىلدى. جەكە قۇرامنىڭ جاۋىنگەرلىك دايىندىعىن كۇشەيتۋ بويىنشا شارالار ازىرلەندى" دەلىنگەن ۆەدومستۆا حابارلاماسىندا.
سونىمەن قاتار، تەرروريزمگە قارسى كۇرەس جونىندەگى رەسپۋبليكالىق جەدەل شتاب كۇشتىك قۇرىلىمدار مەن مەملەكەتتىك ورگانداردىڭ تقو رەجيمى جاعدايىنداعى بىرلەسكەن ءىس-قيمىلدارىنا تالداۋ جۇرگىزۋدە.
"بۇل جۇمىستىڭ ناتيجەسىندە ۇلتتىق قاۋىپسىزدىك ورگاندارىنىڭ جەدەل-قىزمەتتىك ءىس-قيمىلىن ۇيىمداستىرۋدىڭ قۇرىلىمى مەن تاسىلدەرى قايتا ۇيىمداستىرىلادى" دەپ اتاپ ءوتتى ۇلتتىق قاۋىپسىزدىك كوميتەتى.
پرەزيدەنت قاسىم-جومارت توقايەۆ 11 قاڭتاردا ۇلتتىق قاۋىپسىزدىك كوميتەتى ەلدەگى ءقاۋىپتى قاتەردى انىقتاي الماعانىن ايتقان.
پىكىر قالدىرۋ