ساياسي بەلسەندىلىگى ءۇشىن قۋعىندالىپ، بىرنەشە جىل ۋكراينادا باس ساۋعالاعان. قازاقستان سوتى "الاۋىزدىقتى قوزدىردى" دەپ باس بوستاندىعىن 3 جىلعا شەكتەگەن ەرمەك نارىمبايەۆ الماتى اۋەجايىندا ۇستالدى.

"ول ىزدەۋدە جۇرگەن. ايتا كەتەيىك، نارىمبايەۆ قىلمىستىق كودەكستىڭ 174-بابى (الەۋمەتتiك، ۇلتتىق، رۋلىق، ءناسiلدiك، تەكتىك-توپتىق نەمەسە دiني الاۋىزدىقتى قوزدىرۋ) بويىنشا ۇستالعان بولاتىن" دەلىنگەن قالالىق پروكۋراتۋرا حابارلاماسىندا.

قازىرگى ۋاقىتتا نارىمبايەۆ تەرگەۋ يزولياتورىنا قامالعان.

ەرمەك نارىمباي 2015 جىلعى 12 قازاندا ۇستالعان بولاتىن. وعان الەۋمەتتىك جەلىدە ۇلتتىق ار-نامىستى قورلاۋ، ۇلتارازدىقتى قوزدىرۋ باعىتىنداعى اقپاراتتى تاراتتى دەگەن ايىپ تاعىلعان. بەلسەندى سەرىكجان مامبەتالين ەكەۋى ارتىنشا ارەكەتىنە "وكىنەتىنى" تۋرالى حات جازعان. ەرمەك نارىمباي تەرگەۋ يزولياتورىندا ءبىر ايدان استام ۋاقىت اشتىق جاريالاپ، 2016 جىلعى 22 اقپاندا سوت ونى ءۇي قاماققا اۋىستىرۋ تۋرالى شەشىم شىعارعان. كەيىن اپەللياسيا سوتى ونىڭ جازاسىن 3 جىل مەرزىمگە ەركىندىگىن شەكتەۋ جازاسىنا اۋىستىرعان. 2016 جىلعى شىلدەدە ەرمەك نارىمباي قۇزىرلى ورگاندارعا ەسكەرتپەستەن ۋكرايناعا كەتىپ قالعان. ول سودان بەرى ۋكراينادا تۇرىپ كەلدى. 

بەلسەندى قاڭتاردىڭ 23ء-ى كۇنى الەۋمەتتىك جەلىدە ەلگە ورالاتىنىن، بيلىكپەن ديالوگ ورناتقىسى كەلەتىنىن حابارلاعان.