اقش شەنەۋنىكتەرىنىڭ اقپاراتىنا سايكەس، رەسەي الداعى اپتالاردا ۋكرايناعا شابۋىل جاساۋ ءۇشىن قاجەتتى اسكەري الەۋەتتىڭ 70%-عا جۋىعىن دايىندادى. بۇل تۋرالى BBC حابارلادى.  

اتى اتالماعان شەنەۋنىكتەر اقپاننىڭ ورتاسىنان باستاپ ماسكەۋ كوبىرەك اۋىر تەحنيكا اكەلۋى مۇمكىن ەكەنىن ايتادى.

رەسەي ۋكراينا شەكاراسىنا جاقىن جەردە 100 مىڭنان استام اسكەر ورنالاستىرعان، الايدا ماسكەۋ شابۋىل جاساۋدى جوسپارلاپ وتىرعانىن جوققا شىعارادى.

اقش شەنەۋنىكتەرى وزدەرىنىڭ ايىپتاۋلارىنا دالەل كەلتىرگەن جوق.

"ولار بۇل اقپارات بارلاۋ قىزمەتىنىڭ باعالاۋىنا نەگىزدەلگەنىن، ءبىراق ونىڭ سەزىمتالدىعىنا بايلانىستى ەگجەي-تەگجەيلى مالىمەت بەرە المايتىندارىن ايتتى" دەپ حابارلادى Reuters اقپاراتتىق اگەنتتىگى.

ءاتى-جونىن اتاماۋدى سۇراعان اقش-تىڭ ەكى شەنەۋنىگى Reuters اقپارات اگەنتتىگىنە بەرگەن سۇحباتى بويىنشا، اۋا-رايى جاعدايلارى رەسەيگە 15 اقپان مەن ناۋرىز ايىنىڭ سوڭىنا دەيىن اۋىر تەحنيكالاردى جەتكىزۋىنە ەڭ جاقسى مۇمكىندىك بەرەدى.

شەنەۋنىكتەر رەسەيدىڭ ۋكرايناعا باسىپ كىرۋى 50 مىڭعا جۋىق بەيبىت تۇرعىننىڭ ولىمىنە اكەلۋى ىقتيمال ەكەنىن ەسكەرتتى. ولار سونداي-اق شابۋىل بولسا، ۋكراينا استاناسى كييەۆ بىرنەشە كۇن ىشىندە قيراپ، ميلليونداعان ادام جان ساۋعالاپ، ەۋروپادا بوسقىندار داعدارىسىن تۋدىرۋى مۇمكىن دەپ ويلايدى.

ناتو-نىڭ ايماقتاعى كۇشتەرىن نىعايتۋ ءۇشىن پولشاعا قوسىمشا اقش اسكەرلەرى كەلدى.

ءبىرىنشى توپ سەنبى كۇنى ەلدىڭ وڭتۇستىك-شىعىسىنداعى جەشوۆ قالاسىنا قوندى. بايدەن اكىمشىلىگى بىرنەشە كۇن بۇرىن شىعىس ەۋروپاعا 3 مىڭعا جۋىق قوسىمشا اسكەر جىبەرەتىنىن مالىمدەدى.

ماسكەۋ ءوز اسكەرلەرى شەكارا ماڭىنا اسكەري جاتتىعۋلار وتكىزۋ ءۇشىن كەلگەنىن ايتادى، ءبىراق ۋكراينا مەن ونىڭ باتىستىق وداقتاستارى كرەمل شابۋىل جاساۋدى جوسپارلاپ وتىر دەپ الاڭداۋلى.

رەسەي ۋكراينانىڭ ناتو-عا كىرۋىنە جول بەرمەۋ كەرەكتىگىن العا تارتىپ وتىر.

ءالى كۇنگە دەيىن الەمدەگى ەڭ ءىرى يادرولىق ارسەنالدارعا يە رەسەي مەن اقش اراسىنداعى تەكەتىرەس قىرعي-قاباق سوعىستان باستاۋ العان. 

ۋكراينا داعدارىسىنا بايلانىستى باتىس ەلدەرى مەن رەسەي اراسىنداعى شيەلەنىس قالاي ءوربىپ جاتىر: 

• "رەسەي ۋكرايناعا باسىپ كىرۋ ءۇشىن سىلتاۋ دايىنداپ جاتىر" دەپ حابارلادى ءال-جازيرا تەلەارناسى.
• "رەسەي ۋكرايناعا باسىپ كىرۋى مۇمكىن" دەگەن ءقاۋىپ كۇشەيگەن كەزدە اقش-تىڭ مەملەكەتتىك حاتشىسى ەنتوني بلينكەن ەۋروپاعا باردى. 
• "بارلىق نۇسقا تىس قالمايدى. ديپلوماتيالىق نۇسقا دا". اقش مەمحاتشىسى ەۋروپاعا نەگە بارا جاتىر؟
• دجو بايدەن رەسەي ۋكرايناعا شابۋىل جاساسا، ماسكەۋدى "اپات" كۇتىپ تۇرعانىن ەسكەرتتى.
• اقش بارلاۋ اگەنتتەرى رەسەي ۋكرايناعا قاشان شابۋىلداۋى مۇمكىن ەكەنىن جاريالادى.
• رەسەي سوعىس ۇشاقتارى كييەۆكە جاقىن بەلارۋس ەلىنە جينالدى.
• اعىلشىن ساياساتكەرى رەسەي ۋكرايناعا باسىپ كىرەتىنى ءسوزسىز ەكەنىن جانە شابۋىل جاقىن ارادا بولاتىنىن مالىمدەدى.
• اقش، ۇلىبريتانيا ۋكرايناعا قارۋ-جاراق جىبەرىپ جاتىر.
• دانيا، يسپانيا، فرانسيا جانە نيدەرلاندى شىعىس ەۋروپاعا جويعىش ۇشاقتار مەن اسكەري كەمەلەر جىبەرۋدە.
• رەسەي ىقتيمال شابۋىل تۋرالى اقپاراتتاردى جوققا شىعاردى.
• گەرمانيا قازىرگە ۋكرايناعا قارۋ-جاراق بەرمەيتىنىن ايتتى ءبىراق مەديسينالىق كومەك كورسەتەتىنىن جاريالادى.
• ەكى جاق (باتىس-رەسەي) سوعىسقا دايىندىقپەن قوسا، ديپلوماتيالىق كەلىسىمگە كەلۋگە تىرىسۋدا.
• فرانسيا مەن گەرمانيا رەسەيدى ديالوگقا شاقىردى.
• رەسەي، ۋكراينا، گەرمانيا جانە فرانسيا ديپلوماتتارى كەلىسسوز جۇرگىزدى.
• باتىس ەلدەرى ۋكرايناعا شابۋىل جاسالسا، زاردابى اۋىر بولاتىنىن مالىمدەدى.
• اقش ءوز ازاماتتارىن ۋكراينادان شىعىپ كەتۋگە شاقىردى.
• "ءبىز قالاي بولسا دا دايىنبىز". ناتو رەسەيدىڭ تالابىن تويتاردى.
• بايدەن: بۇل – ەكىنشى دۇنيەجۇزىلىك سوعىستان كەيىنگى ەڭ ءىرى شابۋىل بولۋى مۇمكىن. 
• بايدەن رەسەيدىڭ ۋكرايناعا قاشان شابۋىل جاسايتىنىن ايتتى.

• ۆاشينگتون رەسەي قۇبىرىن جاۋىپ، بۇۇ قاۋىپسىزدىك كەڭەسىنىڭ وتىرىسىن وتكىزەتىنىن جاريالادى.

• بۇۇ قاۋىپسىزدىك كەڭەسىنىڭ وتىرىسى بارىسىندا رەسەي مەن اقش وكىلدەرى سوزگە كەلىپ قالدى.
• رەسەي وكىلى كييەۆتىڭ "ءوز تۇبىنە ءوزى جەتەتىنىن" ايتتى.
• ۆاشينگتون مەن ماسكەۋ اراسىنداعى كەلىسسوزدەر شيەلەنىستى باسەڭدەتە المادى.
• اقش ەۋروپاعا كوبىرەك اسكەر جىبەرەتىنىن جاريالادى.
• رەسەي ۆاشينگتوننىڭ ەۋروپاعا كوبىرەك اسكەر جىبەرۋ شەشىمىن ايىپتادى.