سولتۇستىك كورەيا بيلىگى حورەوگراف پەن ونىڭ بىرنەشە شاكىرتىن تۇتقىنعا الدى. "حورەوگراف شەتەلدىك ب ا ق ارقىلى شاكىرتتەرىنە كاپيتاليستىك "بي قيمىلدارىن ۇيرەتكەن" دەپ حابارلادى سولتۇستىك كورەيا اقپارات كوزدەرى. 

2020 جىلدىڭ سوڭىندا سولتۇستىك كورەيا ازاماتتاردى نەگىزىنەن كاپيتاليستىك ەلدەردىڭ، اسىرەسە وڭتۇستىك كورەيا مەن اقش-تىڭ بۇقارالىق اقپارات قۇرالدارىن قاراۋعا نەمەسە تاراتۋعا بايلانىستى كوپتەگەن قۇقىق بۇزۋشىلىقتار ءۇشىن جازالايتىن "رەاكسيالىق ويلار مەن مادەنيەتتى جويۋ تۋرالى" قاتال زاڭ قابىلدادى. اۋىر قىلمىس جاساعاندار ءۇشىن ءولىم جازاسىنا كەسىلەدى.

سونداي-اق بۇل زاڭ ارقىلى كولىك اينەكتەرىن قاراڭعىلاعانى ءۇشىن جۇرگىزۋشىلەر، وڭتۇستىككورەيالىق ستيلدەگى سويلەۋ مەن سلەنگتى پايدالانعانى ءۇشىن ستۋدەنتتەر جازالانادى. ال ەندى حورەوگرافتارعا جاستاردى شەتەلدىك ەسترادا جۇلدىزدارىنىڭ قيمىلدارىن ۇيرەتكەنى ءۇشىن جازالاۋعا قولدانىلدى.

Daily Mail اقپاراتىنا سايكەس، مەملەكەتتىك قاۋىپسىزدىك دەپارتامەنتى مەن پوليسيانىڭ بىرلەسكەن وپەراسياسى انتيسوسياليزمگە قاتىستى تەرگەۋ جۇرگىزىپ، وڭتۇستىككورەيالىق فيلمدەردى كورگەن جانە شەتەلدىك باسىلىمداردى وقىعان ادامداردى قارقىندى تۇردە قۋدالاۋدا.

بيىلعى جىلى انتيسوسياليزمگە قارسى ينسپەكسيا توبى وي مەن مادەنيەت تۋرالى زاڭنىڭ ورىندالۋىنا بارىنشا ۇقىپتى بولعان.

"حورەوگرافتى قۋدالاۋ بولعان جەردە جالپاق ەكراندى تەلەديدارعا شەتەلدىك اندەر مەن بي بەينەلەرى بار USB فلەش-ديسكى جالعانعان" دەيدى سولتۇستىككورەيالىق دەرەككوزدەر.

"ءجاسوسپىرىم ستۋدەنتتەر ەكرانداعى حورەوگرافيا ارقىلى بيلەۋدى ۇيرەنگەن. انتيسوسياليزمگە قارسى تەكسەرۋ توبى فلەش-ديسكىنى تارتىپ الىپ، نۇسقاۋشى مەن بارلىق ستۋدەنتتەردى شتاب-پاتەرىنە الىپ كەتتى" دەپ حابارلاندى.

اقپاراتتار بويىنشا حورەوگراف ايەل پحەنسون ونەر ۋنيۆەرسيتەتىندە حورەوگرافيا ماماندىعى بويىنشا ءبىلىم العان. بىرنەشە جىل بۇرىن ول پحەنسونداعى وكچون ورتا مەكتەبىنە ساباق بەرۋگە جۇمىسقا تۇرعان.

"ءبىراق ءمۇعالىمنىڭ بار بولعانى 3000 ۆون ايلىق جالاقىسىنا ءومىر ءسۇرۋ قيىن بولدى [اقش. $0،60]، سوندىقتان ول ءوز ۇيىنەن جەكە بي اكادەمياسىن اشۋ ارقىلى ءومىر ءسۇردى" دەيدى اتىن اتاماۋدى وتىنگەن تۇرعىن.

"ولار (شاكىرتتەر) سولتۇستىك كورەيا ستيلىندە ەمەس، وڭتۇستىك كورەيا، جۇڭگو جانە امەريكاداعىداي بيلەۋدى ۇيرەنۋدى ءجون كوردى. وسىلايشا، حورەوگراف ولارعا سولاردى ۇيرەتتى" دەيدى تۇرعىن.

ورتالىق كوميتەت "راكسيالىق وي مەن مادەنيەتتى جويۋ تۋرالى" زاڭدى بۇزعانداردى دارەجەسىنە، سىنىبىنا قاراماستان قاتاڭ جازالاۋدى بۇيىرعاندىقتان، بۇل جولى ۇستالعان حورەوگراف پەن ستۋدەنتتەر اۋىر جازادان قۇتىلمايدى. "ولاردىڭ اتا-انالارى دا پارتيادان شىعارىلىپ جازالانۋى مۇمكىن" دەپ حابارلادى دەرەككوز.