قوستانايدا بالالار ءۇيىنىڭ تاربيەلەنۋشىسىن جازعى لاگەردە زورلاۋ ءىسى بويىنشا سوت وتىرىسى باستالدى، دەپ حابارلادى توبولينفو سايتى.
"قوستاناي وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا بالالار ءۇيىنىڭ تاربيەلەنۋشىسىن زورلادى دەپ ايىپتالعان پەداگوگ-پسيحولوگ فارحاد تۋردييەۆكە قاتىستى قىلمىستىق ءىس قارالۋدا" دەلىنگەن حابارلامادا.
ەسكە سالا كەتەيىك، 2021 جىلدىڭ تامىزىندا رۋدنىي بالالار ءۇيىنىڭ تاربيەلەنۋشىسى زورلانعانىن ب ا ق بەتتەرىندە حابارلانعان. بۇل وقيعا بالالار جازعى دەمالىسىن وتكىزگەن لاگەردە بولعان. كەيىننەن پوليسيا دەپارتامەنتى اتالعان ءىستى رەسمي تۇردە راستاپ، تەرگەۋ شارالارى ءجۇرىپ جاتقانىن حابارلاعان. اقىرى ءىس سوتقا دەيىن جەتىپ، پروسەسس جابىق رەجيمدە ءجۇرىپ جاتىر.
فارحاد تۋردييەۆ رۋدنىيداعى بالالار ۇيىندە 10 جىلدان استام جۇمىس ىستەگەن. ول ءومىر بويى باس بوستاندىعىنان ايىرىلعاندارعا ارنالعان "قارا بۇركىت" كولونياسى دەپ اتالىپ كەتكەن 161/3 مەكەمەسىندە پسيحولوگ بولىپ جۇمىس ىستەگەن.
– بۇل فاكت ءبىزدىڭ توبەمىزدەن جاي تۇسكەندەي اسەر ەتتى. سوت بۇل ءىستى شەشەدى دەپ ۇمىتتەنەمىز. ال نەگىزىندە ءمۇعالىم جاقسى بولعان، قيىن جاسوسپىرىمدەرمەن دە جۇمىس ىستەدى. بولعان وقيعانى بولجايتىن ەشقانداي دا جايتتار بولعان جوق. ءتىپتى نە ايتارىمدى بىلمەيمىن، – دەپ بالالار ءۇيىنىڭ ديرەكتورى پاۆەل كوۆال
تۇردييەۆكە قىلمىستىق كودەكستىڭ 120-بابى (زورلاۋ) بويىنشا ايىپ تاعىلعان.
باسىلىمنىڭ حابارلاۋىنشا، جابىرلەنۋشى زورلاۋ تۋرالى ارىزىنان كەيىن رۋدنىي بالالار ۇيىنەن شىعىپ، قازىرگى تاڭدا كوللەدجدە وقىپ جاتىر.
پىكىر قالدىرۋ