گەرمانيانىڭ سىرتقى ىستەر ءمينيسترى اننالەنا باەربوك سوعىس ءقاۋپىن تۋدىرعانى ءۇشىن ماسكەۋدى ايىپتادى. ونىڭ پىكىرىنشە، رەسەي "قىرعي-قاباق سوعىسقا" ۇقساس ديپلوماتيا ارقىلى بەيبىتشىلىككە ءقاۋىپ توندىرۋدە.
باەربوك شيەلەنىستى باسەڭدەتۋ ءۇشىن رەسەيدى "بايىپتى قادامدار جاساۋعا" شاقىردى.
قازىرگى ۋاقىتتا ۋكراينامەن شەكارا ماڭىنا ءجۇز مىڭنان استام رەسەيلىك اسكەر ورنالاستىرىلعان ءارى بەلارۋستە رەسەيلىك اسكەرلەر جاتتىعۋ وتكىزۋدە. بۇگىندە ۋكراينا ءۇش جاعىنان قورشالعان.
باتىس ەلدەرى اسكەر مەن تەحنيكانىڭ بۇنداي ورنالاستىرىلۋىنا الاڭدايدى.
جۇمادان باستاپ دۇنيەجۇزىلىك كوشباسشىلار ءۇش كۇن بويى ميۋنحەن قاۋىپسىزدىك كونفەرەنسياسىنا قاتىسادى. كونفەرەنسيا قارساڭىندا نەمىس سىرتقى ىستەر ءمينيسترى رەسەي "بۇرىن-سوڭدى بولماعان اسكەر ورنالاستىرعانىن"، جاڭا "قىرعي-قاباق سوعىس" باستاعانىن، "ەۋروپالىق بەيبىتشىلىك ءتارتىبىنىڭ نەگىزگى قاعيداتتارىنا قارسى شىعىپ جاتقانىن" ەسكەرتتى.
"قىرعي-قاباق سوعىس" كەزەڭى ەكىنشى دۇنيەجۇزىلىك سوعىستان كەيىن بولعان. ول كەزدە باتىس پەن كەڭەس وداعى اراسىنداعى باسەكەلەستىك ۋشىعىپ، تەكەتىرەس يادرولىق سوعىس قاۋپىنە دەيىن جەتكەن.
بەەربوك ديپلوماتيانى جالعاستىرۋعا شاقىرىپ، "سوعىسقا قاراي ۇلكەن قادامداردان گورى بەيبىتشىلىككە جەتۋدىڭ كىشكەنتاي قادامدارى جاقسىراق" دەدى.
پىكىر قالدىرۋ