قالالىق ءماسليحات دەپۋتاتتارى الماتىداعى قوعامدىق كولىكپەن ءجۇرۋ اقىسىن 20 تەڭگەگە قىمباتتاتۋ تۋرالى باستاما كوتەردى. دەپۋتات اسحات قاباشيەۆتىڭ سوزىنشە، بۇل – جول ءجۇرۋ اقىسىنا جۇمسالىپ جاتقان سۋبسيديانى ۇنەمدەپ، ۇنەمدەلگەن قاراجاتتى باسقا سالاعا باعىتتاۋعا مۇمكىندىك بەرەدى.

– الماتى ءماسليحاتىنىڭ كەزەكتى 16 سەسسياسىندا نەگىزگى شەشىمدەردى قابىلداۋدان بولەك، قوعامدىق كولىكتەگى جول اقىنى 80 تەڭگەدەن كوتەرۋ تۋرالى پراگماتيكالىق وي ايتىلدى. ءوز اتىمنان ءتاريفتى 20 تەڭگەگە بولسا دا كوتەرۋ جولاۋشى تاسىمالى سۋبسيدياسىن اناعۇرلىم قىسقارتىپ، قالا دامۋى ءۇشىن اجەپتاۋىر قاراجات ۇنەمدەلەر ەدى دەپ قوسقىم كەلەدى، – دەيدى دەپۋتات

الايدا كوزدەلىپ وتىرعان وزگەرىس قالا تۇرعىندارىن قۋانتا قويمادى.

"دەپۋتات، اكىم جانە ءماسليحات حاتشىسى ستانيسلاۆ كانكۋروۆ مىرزا، قوعامدىق كولىكتى اقشاعا تارىقتىرۋدى دوعارىڭىزدار. ۇنەمدەگىلەرىڭىز كەلسە، باسقا جوبالاردان ۇنەمدەڭىزدەر. گەلەندۆاگەنمەن جۇرگەندىكتەن، سىزدەرگە جاقسى ارينە، ال قاراپايىم ادامدار كىسى تولى اۆتوبۋستا سىعىلىسىپ كەپتەلىستەردە تۇرۋعا ءماجبۇر. قالا بيۋدجەتىن ۇنەمدەۋدىڭ كوپتەگەن جولدارى بار. ماسەلەن، ءال-فارابي ارقىلى جاياۋ جۇرگىنشىلەر كوپىرىنىڭ كەرەگى نە؟ بىلتىر ناتاليا ليۆينسكايا تانىستىرعان تۇڭعىش پرەزيدەنت پاركىن 1 ملرد تەڭگەگە جوندەۋ شە؟ قالا قازىناسى قالاي جۇمسالىپ جاتقانىن قارار بولسا، قاجەتسىز شىعىنداردى كوپتەپ تابۋعا بولاتىنىنا سەنىمدىمىن. قوعامدىق كولىك – مەكتەپ، اۋرۋحانا سەكىلدى نەگىزگى قاجەتتىلىك قوي" دەپ جازادى تۇرعىنداردىڭ ءبىرى.

دەرەككوز: كازتاگ سايتى