بەلگىلى جۋرناليست، قوعام قايراتكەرى رىسبەك سارسەنبايەۆ جۋرناليست نۇرسەيىت جىلقىشىبايعا بەرگەن سۇحباتىندا مارقۇم زامانبەك ءنۇرقادىلوۆتىڭ ۇيىندە بولات نازاربايەۆپەن كەزدەسكەنىن، ول ارقىلى اعاسى نۇرسۇلتان نازاربايەۆقا سالەمدەمە جولداعانىن ايتتى.

– بۇرىنعى جىلدا زاكەڭدى ەسكە الىپ كەڭسايدا بولعاننان ماقپال داستارحان جايىپ، قۇران وقىتاتىن. سونداي جايتتاردىڭ بىرىنە بولات نازاربايەۆ كەلىپتى. جانىندا سوڭعىسى ما، سوڭعىسىنىڭ الدىندا ۇيلەنگەنى ما كوپ توقالدارىنىڭ ءبىرى وتىردى. بىرىنە ءبىرى انەكدوت ايتىپ وتىردى. ەندى ول انەكدوت ايتاتىن جەر ەمەس قوي. مەن تىپتەن سونىڭ بەت-جۇزىن كورگىم كەلمەدى، كەتىپ قالعىم كەلدى. مەن ءۇشىن ونىمەن داستارحان باسىندا وتىرۋ جيىركەنىشتى بولاتىن. سونىمەن جانىمداعى جىگىتتەر بار، ماقپال بار داستارحاننان ۇلكەن ەمەس، اتتاپ كەتپەيسىڭ... وتىرعاننان كەيىن مەن بولاتقا ايتتىم. بولات قازاقتا ءسوز بار: ءوز اياعىڭمەن كەلدىڭ بە، قۇداي ايداپ كەلدى مە دەگەن. سەن قالاي كەلسەڭ دە ايتەۋىر كەلىپ وتىرسىڭ. ءبىزدىڭ ورتامىزعا. ساعان ايتاتىن ءسوز بار، سەن مۇقيات تىڭدا دا ۇعىپ ال، سوسىن نۇرسۇلتان اعاڭا جەتكىزىپ بار دەدىم. زارەسى ۇشىپ كەتتى، ءتۇرى كەتە باستادى. جانىندا وتىرعان توقالى دا، ماقپال دا ابىگەرلەنىپ، باسقالار دا بۇل كىسى نە ايتقالى تۇر دەپ.... سوسىن مەن زاكەڭنىڭ مەملەكەتكە، الماتىعا، قازاققا سىڭىرگەن قايراتكەرلىك ەڭبەگى تۋرالى قىسقا-قىسقا ايتتىم. مىنەكەي، وسىنداي حالىق قادىرلەگەن اسىل ازاماتتى ءوزىن-وزى ءۇش رەت اتىپ ءولدى دەپ، وزىنە جالا جاپتى. قالاي سونى ايتقىزىپ وتىر. ونى ايتقىزىپ وتىرعان سەنىڭ اعاڭ عوي. اتقىزىپ وتىرعان دا سەنىڭ اعاڭ شىعار. ءبىز سولاي ويلايمىز. سەن اعاڭا ايتىپ بار: مىنا وتىرىگىن دوعارسىن، ول كىسى ءتىرى بولسا، ءوز نامىسىن ءوزى قورعار ەدى. وتە نامىسقوي ادام، باتىر ادام عانا نامىسقوي بولادى. ال ول كىسىنى كوزى جوق، سوندىقتان ول كىسىنىڭ نامىسىن ءبىز قورعايمىز. ارتىندا قالعان ەل جۇرتى، قالعان قازاق قورعايدى، ءويتىپ قورلاماسىن باتىرىمىزدى. ولتىرگەنى ازداي ەندى قورلاۋى نەسى. اعاڭا ايتىپ بار، قىلمىستىق ءىس قوزعاسىن، قىلمىستى اشسىن. ولاي بولماسا، ءبارى ءۇشىن ءوزى جاۋاپتى. (بولات) دەدى (باسىن شۇلعادى - رەد). وندا وسىنى جەتكىزىپ بار دەدىم. ونداي نارسەنى، وسى سۇراقتاردى مەن كەزدەسىپ جاتسام، نۇرسۇلتان نازاربايەۆقا دا قويار ەدىم، –  دەيدى ول.

رىسبەك سارسەنبايەۆ مەملەكەت جانە قوعام قايراتكەرى، بۇرىنعى اقپارات ءمينيسترى، وپپوزيسيا ليدەرى، 2006 جىلى قاستاندىقپەن ولتىرىلگەن التىنبەك سارسەنبايەۆتىڭ تۋعان اعاسى. ول ءىنىسىنىڭ ولىمىنە ەكس-پرەزيدەنت نۇرسۇلتان نازاربايەۆ پەن ونىڭ اينالاسىندا جۇرگەن نۇرتاي ابىقايەۆ، رەسمي دەرەك بويىنشا اۆستريا تۇرمەسىندە وزىنە قول جۇمسادى دەلىنەتىن راحات الييەۆتەردى كىنالايدى.