اباي، ۇلىتاۋ، جەتىسۋ وبلىستارى 2022 جىلعى ماۋسىمدا قۇرىلۋى مۇمكىن، دەپ حابارلادى HOLA News سايتى ءوزىنىڭ دەرەككوزدەرىنە سۇيەنىپ.
باسىلىم دەرەككوزىنىڭ مالىمەتىنشە، پرەزيدەنت قاسىم-جومارت توقايەۆ ءتيىستى جارلىققا ماۋسىم ايىندا قول قويادى. وعان دەيىن اۋماقتىق ءبولىنىس، شەنەۋنىكتەردى تاعايىنداۋ، جاڭا ايماقتاردىڭ بيۋدجەتىن بەكىتۋ سەكىلدى ماسەلەلەر شەشىمىن تابۋعا ءتيىس. قازىرگى ۋاقىتتا ۇكىمەت پەن پرەزيدەنت اكىمشىلىگىندە تالقىلاۋ ءجۇرىپ جاتىر.
پرەزيدەنت 16 ناۋرىز كۇنگى جولداۋىندا ەلدە جاڭادان ءۇش وبلىس قۇرىلاتىنىن ءمالىم ەتكەن.
شىعىس قازاقستان وبلىسى ەكىگە ءبولىنىپ، جاڭا اباي وبلىسى قۇرىلادى. وبلىس ورتالىعى سەمەي قالاسى بولادى. قاراعاندى وبلىسى ەكىگە ءبولىنىپ، ۇلىتاۋ وبلىسى قۇرىلادى. وبلىس ورتالىعى – جەزقازعان قالاسى. الماتى وبلىسى ەكىگە ءبولىنىپ، جاڭادان الماتى جانە جەتىسۋ وبلىستارى قۇرىلادى. الماتى وبلىسىنىڭ ورتالىعى قاپشاعاي قالاسى، جەتىسۋ وبلىسىنىڭ ورتالىعى تالدىقورعان قالاسى بولادى. قوعام تاراپىنان قاپشاعاي قالاسىن قونايەۆ قالاسى دەپ وزگەرتۋ ۇسىنىسى تۇسسە، پرەزيدەنت ۇسىنىستى قولدايتىنىن جەتكىزدى.
پىكىر قالدىرۋ