بريۋسسەلدەگى ناتو سامميتىندە اليانس ەلدەرىنىڭ باسشىلارى رەسەيدىڭ ۋكرايناعا باسىپ كىرۋىن، ۋكرايناعا كومەك، الەمدەگى قاۋىپسىزدىكتى ساقتاۋ ماسەلەلەرىن تالقىلادى.
اقش پرەزيدەنتى دجو بايدەن رەسەيدى "ۇلكەن جيىرمالىقتان" شىعارۋ باستاماسىن قولداپ، رەسەيدى شىعارۋ مۇمكىن بولماسا، "ۇلكەن جيىرمالىققا" ۋكراينانى شاقىرۋعا بولاتىنىن ايتتى.
بايدەن ءسوزىنىڭ كوپ بولىگى اليانستى بىرلىككە شاقىرۋعا بايلانىستى بولدى.
ول رەسەي پرەزيدەنتىن توقتاتۋدا سانكسيانىڭ تيىمدىلىگىنە يەك ارتاتىنىن جەتكىزدى.
ۇلىبريتانيانىڭ پرەمەر-مينيسترى بوريس دجونسون ناتو ەلدەرىنە ۋكراينانى ساپالى ءارى قاجەتتى مولشەردەگى قارۋمەن قامتاماسىز ەتۋ قيىن بولاتىن ايتا وتىرىپ، بريتانيا مەن ناتو-داعى ونىڭ وزگە وداقتاستارى ۋكرايناعا قارۋ جەتكىزۋدى جالعاستىراتىنىن ءمالىم ەتتى. ول ۋكراينا قارۋلى كۇشتەرىنە وزگە قارۋدان بولەك، 6000 زىمىران جىبەرەتىنىن ايتتى.
سونداي-اق ول سانكسيانى كۇشەيتۋگە شاقىردى.
– بۇل – تەك باستاماسى. ءبىز پۋتينگە ۋكراينا جالعىز ەمەستىگىن جەتكىزگىمىز كەلەدى. ءبىز كييەۆ، ماريۋپول، لۆوۆ جانە دونەسك حالقىن قولدايمىز. زەلەنسكيي ايتقانداي، ۋكراينا حالقى جەڭۋگە ءتيىس، ال پۋتين جەڭىلۋى كەرەك، – دەدى ول.
بوريس دجونسون ۆلاديمير زەلەنسكييدىڭ تانك پەن ۇشاق بەرۋ جونىندەگى ءوتىنىشىن ناتو-عا ورىنداۋ لوگيكالىق تۇردە قيىن ەكەنىن اتاپ ءوتتى.
ناتو-نىڭ باس حاتشىسى يەنس ستولتەنبەرگ اليانس كۇشتەرى سوعىسقا قاتىسۋدى جوسپارلاپ وتىرماعانىن قايتالادى.
– ءبىز ۋكراينانى دامىعان پرو جۇيەلەرىمەن، تانككە قارسى قارۋمەن، وق ءدارى جانە جانارمايمەن قامتاماسىز ەتەمىز. الايدا ناتو كۇشتەرى اۋەدە دە، جەردە دە كونفليكتكە قاتىسپايتىنىن انىق ايتقان ءجون. بۇل شەشىم كونفليكت ۋكراينا اۋماعىنان شىعىپ كەتپەۋى ءۇشىن، بۇدان دا ۇلكەن قايعىعا دۋشار ەتىپ، ءولىم مەن قيراندىعا سوقتىرماس ءۇشىن قابىلدانىپ وتىر، – دەدى ول.
سامميتكە بەينەبايلانىس ارقىلى قوسىلعان ۆلاديمير زەلەنسكيي رەسەي باسقىنشىلىعىنان كەلگەن شىعىن مەن زالال تۋرالى ايتىپ، ەۋروپا ەلدەرىن ۋكراينانى قولداۋعا بىرىككەنى ءۇشىن العىس ءبىلدىردى.
الايدا ول كومەك ءسال كەش كەلگەنىن ايتىپ، "ەگەر ەۋروپا سانكسيالارىن ەرتەرەك قابىلداعاندا بالكىم، رەسەي سوعىسقا بارمايتىن با ەدى" دەدى.
سونداي-اق ول ۋكراينانىڭ ەۋرووداققا قوسىلۋ تۋرالى ءوتىنىشىن قابىلداۋدى ءوتىندى.
زەلەنسكيي ۇندەۋىندە ەۋروپا وداعىنا كىرەتىن كەي ەلدەردىڭ كومەكتەسۋ ءۇشىن كوپ نارسە ىستەپ جاتپاعانىن نەمەسە مۇلدە ءۇنسىز وتىرعانىن سىنادى.
ول ۋكرايناعا كومەك ءۇشىن پولشانى، ەستونيا، چەحيا جانە يتاليانى ماقتادى. فرانسياعا پرەزيدەنتىنە "ءبىز ءۇشىن تۇرا الاتىنىڭا سەنەمىن" دەسە، شۆەسياعا قاراتا سويلەگەندە تۋلارىنداعى تۇستەردىڭ ۇقساستىعىن مەڭزەپ "سارىلار مەن كوكتەر ءارقاشان بىرگە بولۋعا ءتيىس" دەدى.
گەرمانيا، پورتۋگاليا، يرلانديانىڭ كەش قابىلداعان شارالارى مەن قۇلىقسىزدىعىنا نازار اۋدارىپ، ۆەنگريانىڭ بەيتاراپتىعىن سىنادى.
دەرەكككوز: ۆۆس
پىكىر قالدىرۋ