سەنات دەپۋتاتتارى الەۋمەتتىك جەلىلەردى بۇعاتتاۋعا مۇمكىندىك بەرەتىن "قازاقستان رەسپۋبليكاسىنىڭ كەيبىر زاڭنامالىق اكتىلەرىنە بالانىڭ قۇقىعىن قورعاۋ، ءبىلىم بەرۋ، اقپارات جانە اقپاراتتاندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭ جوباسىن ماجىلىسكە قايتاردى.
سەنات ءتوراعاسى ماۋلەن اشىمبايەۆ زاڭ جوباسى قوعامدا قىزۋ تالقىلانعانىن ايتا كەلە، زاڭ جوباسىنداعى الەۋمەتتىك جەلىلەر مەن مەسسەندجەرلەردىڭ جۇمىسى شەكتەۋگە قاتىستى نورمالاردى الىپ تاستادى.
دەپۋتاتتار اقپارات جانە قوعامدىق دامۋ مينيسترلىگىنە بالاعا قاتىستى كيبەربۋلينگ دەپ تانىلعان اقپاراتتى جويۋعا عانا قۇزىرەت قالدىرىپ، ينتەرنەت-رەسۋرستاردىڭ، الەۋمەتتىك جەلىلەر مەن مەسسەندجەرلەردىڭ جۇمىسىن شەكتەۋگە نەمەسە توقتاتۋعا قاتىستى وكىلەتىن قىسقارتتى.
زاڭ جوباسىنىڭ ءماجىلىس ماقۇلداعان رەداكسياسىندا الەۋمەتتىك جەلىلەر مەن مەسسەندجەرلەردى قازاقستاندا "زاڭدى وكىلدەرىن" تاعايىنداۋعا، سونىمەن قاتار، اقپارات جانە قوعامدىق دامۋ مينيسترلىگى تالاپ ەتكەن كونتەنتتى 24 ساعاتتىڭ ىشىندە وشىرۋگە مىندەتتەيتىن تۇس بولعان. ەگەر الەۋمەتتىك جەلى ۋاكىلەتتى ورگان تالابىن ورىنداماسا، مينيسترلىك جەلىنىڭ "قازاقستان اۋماعىندا جۇمىسىن شەكتەۋگە" قۇقىلى.
زاڭ جوباسىنداعى وسى تۇزەتۋلەر مەدياساراپشىلار اراسىندا قىزۋ تالقىلانىپ، ولاردىڭ نارازىلىعىن تۋدىرعان. ولاردىڭ سوزىنشە، مينيسترلىككە بەرۋ كوزدەلگەن قۇزىرەت Facebook، Instagram، Youtube، Telegram، Whatsapp جانە باسقا دا جەلىلەردىڭ قازاقستان ينتەرنەت كەڭىستىگىندە جۇمىس ىستەۋىنە ءقاۋىپ توندىرەدى.
اتالعان تۇزەتۋلەردى ەنگىزۋمەن اينالىسقان جۇمىس توبىنىڭ قاتارىندا دەپۋتاتتار دينارا زاكييەۆا مەن ايدوس سارىم بولعان.
پىكىر قالدىرۋ