تەسلا كومپانياسىنىڭ باس اتقارۋشى ديرەكتورى، الەمدەگى ەڭ باي ادام يلون ماسك دۇيسەنبىدە Twitterء-دى ساتىپ الۋ تۋرالى كەلىسىمگە قول قويدى.
"ءسوز بوستاندىعى – جۇمىس ىستەپ تۇرعان دەموكراتيانىڭ نەگىزى، ال Twitter – ادامزاتتىڭ بولاشاعى ءۇشىن ماڭىزدى ماسەلەلەر تالقىلاناتىن سيفرلىق الاڭ" دەدى ماسك ساتىپ الۋدان كەيىنگى مالىمدەمەسىندە.
ماسك Twitterء-دىڭ الگوريتمدەردى اشىق بولاتىنىن ايتتى. ول بۇعان دەيىن ادامدار نە كورەتىنىن جانە Twitter-دە مازمۇننىڭ قانشالىقتى كەڭ تارالاتىنىن انىقتايتىن باعدارلامالىق قۇرالدى اشۋ كەرەكتىگىن جەتكىزگەن. الەمدەگى ەڭ داۋلەتتى ادامنىڭ پىكىرىنشە، Twitter ونىڭ مەنشىگىنە وتكەن سوڭ، سپام-بوتتار جوعالادى. ماسك Twitter-دەگى بوتتاردىڭ تارالۋىمەن، بەلگىلى ءبىر تاقىرىپتارداعى تۆيتتەرگە جاۋاپ بەرۋگە باعدارلامالانعان جالعان اككاۋنتتارمەن كۇرەسپەك.
"ەگەر ءبىزدىڭ Twitter-دەگى ۇسىنىسىمىز ءساتتى بولسا، ءبىز سپام-بوتتاردى جەڭەمىز!" دەگەن ماسك وتكەن اپتادا Twitter-دە بارلىق "شىنايى ادامداردىڭ ءتۇپنۇسقالىعىن راستاۋدى" قالايتىنىن ايتقان.
"بارلىق ادامداردى اۋتەنتيفيكاسيالاۋ ارقىلى Twitterء-دى بۇرىنعىدان دا جاقسارتقىم كەلەدى" دەدى ول.
وعان قوسا، ول Twitterء-دىڭ تولەم جۇيەسى ءۇشىن كريپتوۆاليۋتا (Dogecoin) قولدانىلۋى مۇمكىن ەكەنىن ايتتى.
كومپانيانىڭ ديرەكتورلار كەڭەسى يلون ماسكتىڭ الەۋمەتتىك مەديا الىبىن جەكەمەنشىككە الۋ تۋرالى 44 ميلليارد دوللارلىق ۇسىنىسىن ءبىراۋىزدان قابىلداعاننان كەيىن Twitter اكسيالارى 5%-دان استام قىمباتتادى.
اق ءۇي بۇل كەلىسىم تۋرالى پىكىر سۇراعان ساۋالعا تۇسىنىكتەمە بەرۋدەن باس تارتتى، دەگەنمەن اقش پرەزيدەنتى دجو بايدەن الەۋمەتتىك مەديا پلاتفورمالارىنىڭ كۇشىنە كوپتەن بەرى الاڭداعانىن جەتكىزدى.
"ءبىزدىڭ الاڭداۋشىلىقتارىمىز اياق استىنان بولعان جوق. "پلاتفورمالار قاجەت جاعدايدا جاۋاپكەرشىلىككە تارتىلۋى كەرەك. پرەزيدەنت الەۋمەتتىك مەديا پلاتفورمالاردىڭ، سونىڭ ىشىندە Twitter جانە باسقالاردىڭ جالعان اقپارات تاراتۋ كۇشى تۋرالى الاڭداۋشىلىقتارى تۋرالى كوپتەن بەرى ايتىپ كەلەدى" دەدى دەدى اق ءۇيدىڭ باسپا ءسوز حاتشىسى دجەن پساكي.
ال رەسپۋبليكاشىلداردى، اسىرەسە ترامپتى قولدايتىن Fox News سياقتى باسىلىمدار يلون ماسكتىڭ ساتىپ الۋىن قۇپتايتىن جاڭالىقتار تاراتىپ جاتىر.
