الەمدەگى ەڭ باي ادامداردىڭ ءبىرى بيلل گەيتس الەمدەگى ەڭ باي ادام يلون ماسكتىڭ Twitter-دەگى ماقساتتارىنا كۇمان كەلتىرەدى. "ول (يلون ماسك) جاعدايدى ناشارلاتۋى مۇمكىن" دەپ ويلايدى گەيتس.
سارسەنبىدە "Wall Street Journal" باس ديرەكتورلارىنىڭ سامميتىندە سويلەگەن سوزىندە گەيتس ماسك Twitterء-دى قالاي وزگەرتەتىنى بەلگىسىز ەكەنىن ايتتى، سونىمەن قاتار الەۋمەتتىك مەديا پلاتفورمالارىندا جالعان اقپاراتتىڭ تارالۋىنا الاڭداۋشىلىق ءبىلدىردى.
مايكروسوفتتىڭ نەگىزىن قالاۋشى ماسكتىڭ باسقا كومپانيالارداعى تاجىريبەسى كەرەمەت ەكەنىن مويىنداپ، ونىڭ Tesla جانە SpaceX باسشىلىعىنداعى ۋاقىتىن "اقىلعا قونىمدى" دەپ باعالادى. گەيتس ماسك بۇل كومپانيالاردا تاماشا ينجەنەرلەر توبىن بىرىكتىرۋدە جاقسى جۇمىس جاسادى دەپ ايتتى.
"مەن بۇل جولى ولاي بولاتىنىنا كۇماندانامىن، ءبىراق بىزدە اشىق وي بولۋى كەرەك جانە ەشقاشان يلوندى تومەن باعالاماۋ كەرەك" دەيدى ول.
گەيتسكە "ماسكتىڭ Twitter-دەگى ماقساتى قانداي جانە ونىڭ ءسوز بوستاندىعىن العا جىلجىتۋ ارەكەتى اقىلعا قونىمدى ما؟" دەگەن سۇراق قويىلدى.
"[تۆيتتەردەگى] ۆاكسينالار ادامداردى ولتىرەدى نەمەسە بيلل گەيتس ادامداردى باقىلاپ وتىر" دەگەن نارسەگە ول قالاي قارايدى؟" دەپ قايتارا سۇراق قويدى گەيتس.
"ونىڭ ماقساتى نەمەن اياقتالادى؟ كونسپيرولوگيالىق تەوريالار سونشالىقتى جىلدام تارالا ما؟ سوعان توسقاۋىل قوياتىن ماقساتتى ۇستانا ما؟" دەدى گەيتس.
ماسكتىڭ وكىلى CNBCء-تىڭ تۇسىنىكتەمە سۇراۋىنا بىردەن جاۋاپ بەرمەدى.
سوڭعى بىرنەشە اپتادا ماسك ءسوز بوستاندىعىن دامىتۋدان باسقا Twitterء-دى جاقسارتۋدىڭ بىرنەشە جولدارىن ايتقان. مىسالى، ول پلاتفورمانى پايدالانۋ ءۇشىن كومپانيالاردان از مقلشەردە اقى الۋدى باستاۋدى ۇسىنعان.
جالعان اقپاراتپەن كۇرەسۋ
كوۆيد-19 پاندەمياسى كەزىندە ۆاكسينالار تۋرالى جالعان اقپارات الەۋمەتتىك جەلىلەردە وتە كەڭ تارادى. كەيبىرەۋلەر "گەيتس 5G چيپتەرىن ۆاكسينالار ارقىلى ادامدارعا يمپلانتاسيالاپ جاتىر" دەگەن كوسپيرولوگيالار تاراتقان.
"بۇل مۇلدە كۇتپەگەن جانە وتە وعاش جاعداي بولدى، ادامدار (ماعان) ايقايلاپ، نارازىلىق بىلدىرەدى" دەدى گەيتس.
ول الەۋمەتتىك مەديا پلاتفورمالارىنا يەلىك ەتەتىندەردىڭ شىندىقتى قامتاماسىز ەتۋدە ءرولى بار دەپ سانايدى.
"ەگەر ۆاكسينالار تۋرالى ايتاتىن سەنىمدى ليدەرلەر بولماسا، پلاتفورمانىڭ كونسپيرولوگياعا قارسى جۇمىس ىستەۋى وتە قيىن. سوندىقتان مەنىڭ ويىمشا، بىزدە كوشباسشىلىقمەن ءارى پلاتفورمامەن ماسەلە بار" دەدى ول.
گەيتس بولاشاقتا ۆاكسينا تۋرالى ناقتى اقپاراتتى تاراتۋعا كومەكتەسۋ ءۇشىن 3 مىڭ ادامنان تۇراتىن الەۋمەتتىك مەديا بولىمشە قۇرۋدى جوسپارلاپ وتىرعانىن ايتتى.
