رەسەيدىڭ قارا تەڭىزدەگى "موسكۆا" سوعىس كەمەسىن سۋعا باتىرۋ ءۇشىن اقش ۋكرايناعا كومەكتەسكەن. "ۆاشينگتون كييەۆكە بارلاۋ مالىمەتتەرىن بەردى" دەپ حابارلادى ۆۆس.
ءاتى-جونىن اتاماعان شەنەۋنىكتەردىڭ ايتۋىنشا، ۋكراينا اقش-تان ودەسسانىڭ وڭتۇستىگىنە قاراي ءجۇزىپ بارا جاتقان كەمە تۋرالى سۇراعان. اقش ول "موسكۆا" كەمەسى ەكەنىن ايتىپ، ونىڭ ورنالاسقان جەرىن راستاۋعا كومەكتەسكەن. سودان كەيىن ۋكراينا وعان ەكى زىمىران اتقان.
اقپاراتقا بايلانىستى پەنتاگون تۇسىنىكتەمە بەرگەن جوق. ءبىراق پەنتاگوننىڭ باسپا ءسوز حاتشىسى اقش ۋكرايناعا ءوزىن قورعاۋعا كومەكتەسۋ ءۇشىن بارلاۋ اقپاراتىن بەرگەنىن اتاپ ءوتتى.
بۇقارالىق اقپارات قۇرالدارىندا كەلتىرىلگەن ءاتى-جونىن اتاماعان امەريكالىق شەنەۋنىكتەردىڭ سوزىنشە، اقش ۋكرايناعا "موسكۆانىڭ" ورنالاسقان جەرىن انىقتاۋعا كومەكتەسكەنىمەن، كەمە نىساناعا الىناتىنىن بىلمەگەن.
رەسەيدىڭ 510 ەكيپاجى بار اسكەري كەمەسىنىڭ سۋعا باتۋى ۇلكەن سيمۆولدىق مانگە يە بولىپ، ورىس كۇشتەرىنە اسكەري سوققى رەتىندە اسەر ەتكەن.
بۇعان دەيىن نيۋ-يورك تايمس گازەتى "رەسەيدىڭ جوعارى لاۋازىمدى گەنەرالدارىنىڭ سوعىس الاڭىنداعى ورىندارى تۋرالى مالىمەتتەردى كييەۆكە اقش بارلاۋى بەرىپ وتىر" دەگەن اقپارات تاراتقان. پەنتاگوننىڭ باسپا ءسوز حاتشىسى دجون كيربي ونى جوققا شىعارعان.
اق ءۇيدىڭ ۇلتتىق قاۋىپسىزدىك كەڭەسى دە اقش ۋكرايناعا جوعارى لاۋازىمدى رەسەيلىك وفيسەرلەردى نىساناعا الۋعا كومەكتەسكەنىن جوققا شىعاردى.
"ءبىز رەسەيلىك گەنەرالداردى ءولتىرۋ نيەتىمەن بارلاۋ مالىمەتتەرىن بەرمەيمىز" دەدى اق ءۇي ۇلتتىق قاۋىپسىزدىك كەڭەسىنىڭ باسپا ءسوز حاتشىسى ادريەن ۋوتسون.
پىكىر قالدىرۋ