شقو دا 2021 جىلى ءبىلىم بەرۋ وبەكتىلەرىن سالۋعا جانە ماتەريالدىق-تەحنيكالىق بازانى نىعايتۋعا بارلىعى 13،1 ملرد تەڭگە باعىتتالدى. ءبىلىم وردالارىنىڭ ماتەريالدىق-تەحنيكالىق بازاسىن جاقسارتۋا ەرەكشە كوڭىل بولىنۋدە. بۇل تۋرالى وبلىستىق ءماسليحاتتىڭ كەزەكتى XV سەسسياسىندا شقو اكىمى دانيال احمەتوۆ ءمالىم ەتتى.
ونىڭ ايتۋىنشا، وسكەمەن قالاسىنداعى تەحنولوگيالىق كوللەدج بەن قۇرىلىس كوللەدجىنە ارنالعان 9 قاباتتى ەكى جاتاقحانا عيماراتىنىڭ قۇرىلىسى اياقتالۋعا جاقىن.
– 3 جاستان 6 جاسقا دەيىنگى بالالاردى مەكتەپكە دەيىنگى تاربيەمەن قامتاماسىز ەتۋ ماسەلەسى 100% شەشىمىن تاپقان. وسكەمەن جانە زايسان قالالارىندا شاعىن ورتالىق جانە 1220 ورىندىق 7 جەكەمەنشىك بالاباقشا اشۋ ەسەبىنەن 2 جاستان 6 جاسقا دەيىنگى بالالاردى مەكتەپكە دەيىنگى ۇيىمدارمەن قامتاماسىز ەتۋ 8%-عا ءوسىپ، 97،5%-دى قۇرادى. بارلىق ءبىلىم بەرۋ ۇيىمدارىندا ەرەكشە ءبىلىم بەرىلۋىنە قاجەتتىلىگى بار بالالاردى ينكليۋزيۆتى وقىتۋ ءۇشىن جاعداي جاسالعان. كوپ بالالى جانە از قامتىلعان وتباسىلاردان شىققان بالالاردى قولداۋ ادەتتەگىدەي باسىمدىققا يە بولىپ وتىر، – دەدى ايماق باسشىسى.
جىل سايىن جاپپاي وقىتۋ قورىنىڭ كولەمى ۇلعايىپ كەلەدى. وتكەن جىلى تەگىن تاماقپەن، مەكتەپ فورماسىمەن، اياق كيىممەن قامتاماسىز ەتۋگە وبلىستىق بيۋدجەتتەن 3،5 ملرد تەڭگە بولىنگەن.
– ەڭبەك رەسۋرستارىن دايىنداۋ ماسەلەسىنە كوزقاراس ايتارلىقتاي وزگەردى. "جاس مامان" جوباسى بويىنشا 11 قۇزىرەتتىلىك ورتالىعى اشىلدى. از قامتىلعان وتباسىلاردان شىققان بالالاردى قولداۋ ءارى جوعارى ءبىلىمدى ماماندار دايارلاۋ بويىنشا الەۋمەتتىك قولداۋ جالعاسىن تاۋىپ جاتىر. بيۋدجەتتىك گرانتتار العان ستۋدەنتتەر سانى 65%-عا ارتقان، – دەدى وبلىس اكىمى جيىن بارىسىندا.
پىكىر قالدىرۋ