قارجى نارىعىن رەتتەۋ جانە دامىتۋ اگەنتتىگى كرەديت راقىمشىلىعى ماسەلەلەرى بويىنشا تاراپ جاتقان اقپارات جالعان ەكەنىن حابارلادى.
"الەۋمەتتىك جەلىلەردە جانە مەسسەندجەرلەردە "كرەديت راقىمشىلىعى" جاسالدى جانە "حالىقتىڭ قارىزدارى ەسەپتەن شىعارىلدى" دەگەن دايەكسىز اقپارات بەلسەندى تۇردە تاراپ جاتىر.
"قازاقستان رەسپۋبليكاسى ازاماتتارىنىڭ بورىش جۇكتەمەسىن ازايتۋ شارالارى تۋرالى" مەملەكەت باسشىسىنىڭ 2019 جىلعى 26 ماۋسىمداعى جارلىعىن ورىنداۋ ءۇشىن قابىلدانعان "قازاقستان رەسپۋبليكاسى ازاماتتارىنىڭ بورىش جۇكتەمەسىن ازايتۋعا بولىنگەن قاراجاتتى پايدالانۋدىڭ كەيبىر ماسەلەلەرى تۋرالى" ق ر ۇكىمەتىنىڭ 2019 جىلعى 15 شىلدەدەگى قاۋلىسىنا قاتىستى ءۇش جىل بۇرىنعى اقپارات بار 2019 جىلعى بەينەروليك تاراتىلۋدا" دەلىنگەن قارجى نارىعىن رەتتەۋ جانە دامىتۋ اگەنتتىگىنىڭ حابارلاماسىندا.
وسى قاۋلى شەڭبەرىندە كومەك 2019 جىلعى قىركۇيەكتەن باستاپ 2020 جىلعى ءساۋىر ارالىعىندا كورسەتىلگەن. ناتيجەسىندە 577،7 مىڭ ازامات ءۇشىن جالپى سوماسى 120،5 ملرد تەڭگە بولاتىن بەرەشەكتى ەسەپتەن شىعارۋ ءراسىمى جۇرگىزىلگەن.
قاۋلى 2019 جىلعى 13 جەلتوقساندا قولدانىسىن توقتاتقان جانە قازىرگى ۋاقىتتا ونىڭ زاڭدى كۇشى جوق. بۇل باستاما – ءبىر رەتتىك باستاما.
اگەنتتىك ازاماتتار مەن بۇقارالىق اقپارات قۇرالدارىنان جالعان مالىمەتتەرگە سەنبەۋدى جانە اقپاراتتى تەك رەسمي جانە تەكسەرىلگەن دەرەككوزدەردەن باسشىلىققا الۋدى سۇرادى.
پىكىر قالدىرۋ