ۋكرايناداعى سوعىس كەزىندە رەسەي قورعانىس مينيسترلىگى باسپا ءسوز قىزمەتىنىڭ حاتشىسى، پولكوۆنيك ۆلاديمير يۆانوۆ قازا تاپقان. بۇل تۋرالى رەسەيدىڭ مالىمەتتەر بازاسىن نەگىزگە العان مەديازونا باسىلىمى حابارلادى.
ەڭ ءبىرىنشى ونىڭ ءولىمى جونىندە جۋرناليست ەۆگەنيي پوددۋبنىي جازىپ، 9 مامىردا "اجالسىزدار پولكىنىڭ" اكسياسىنا يۆانوۆتىڭ پورترەتىن ۇستاپ شىققان.
اقپكراتتاردا 41 جاستاعى ۆلاديمير يۆانوۆ 25 ناۋرىزدا قازا تاپقانى ايتىلادى. ونىڭ قايتىس بولعانى رەسمي تۇردە 5 كۇننەن كەيىن، 2022 جىلدىڭ 30 ناۋرىزىندا راستالعان. مۇراگەرلىك ءىستى راسىمدەگەن نوتاريۋس ولگەن پولكوۆنيكتىڭ تۇرعىلىقتى مەكەن-جايى رەتىندە قورعانىس مينيسترلىگىنىڭ ماسكەۋدەگى باس عيماراتىن كورسەتكەن.
رەسەي قورعانىس مينيسترلىگى باسپا ءسوز قىزمەتكەرىنىڭ قازا تاپقانىن، قانداي وقيعا كەزىندە وققا ۇشقانىن رەسمي تۇردە حابارلاعان جوق.
"مەديازونا" مەن بي-بي-سي مالىمەتتەرىنە سۇيەنسەك، اشىق دەرەككوزدەر ارقىلى رەسەي اسكەرىنىڭ ۋكراينادا 2500-دەن استام جاۋىنگەرى، اسكەري شەنى پودپولكوۆنيكتەن جوعارى 60-قا جۋىق وفيسەرى قازا تاپقان. ال رەسەي قورعانىس مينيسترلىگى ناۋرىز ايىنىڭ سوڭىندا ۋكراينادا 1300 جاۋىنگەرى ولگەنىن مويىنداعان، ودان كەيىن ولگەندەر تۋرالى اقپارات بەرگەن ەمەس.
