ساياساتتانۋشى راسۋل جۇمالى ەلشىلىك قىزمەتكە قايتىپ باردى.

"مەملەكەت باسشىسىنىڭ جارلىعىمەن راسۋل بەرەكەت ۇلى جۇمالى قازاقستان رەسپۋبليكاسىنىڭ ليۆان رەسپۋبليكاسىنداعى توتەنشە جانە وكىلەتتى ەلشىسى لاۋازىمىنا تاعايىندالدى" دەلىنگەن اقوردا سايتىنداعى اقپاراتتا.

راسۋل بەرەكەت ۇلى جۇمالى  1971 جىلى 15 اقپاندا الماتى قالاسىندا دۇنيەگە كەلگەن. ءال-فارابي اتىنداعى قازاق مەملەكەتتىك ۋنيۆەرسيتەتىنىڭ شىعىستانۋ فاكۋلتەتىن بىتىرگەن. 1992-2007 جىلدار ارالىعىندا ديپلوماتيالىق قىزمەتتە: قازاقستان رەسپۋبليكاسىنىڭ سىرتقى ىستەر مينيسترلىگىندە جانە ۇكىمەتىندە، سونداي-اق مىسىر، بىرىككەن اراب امىرلىكتەرى، يزرايل، ليۆيا، ءبىرقاتار باسقا مەملەكەتتەردەگى قازاقستان ەلشىلىگىندە جۇمىس اتقارعان.

"ەكسكليۋزيۆ" جۋرنالىنىڭ باس رەداكتورى بولعان.

راسۋل جۇمالى قوعامدىق بەلسەندىلىگىمەن، ساياسي ساراپتامالارىمەن، ءتىل جاناشىرى رەتىندە بەلگىلى. مەملەكەتتىك قىزمەتتەن كەتكەن سوڭ بيلىك ساياساتىنىڭ كەلىسپەيتىن تۇستارىن، كەمشىلىكتەرىن الەۋمەتتىك جەلىدە، سۇحباتتارىندا، ماقالالارىندا اشىق ايتىپ، بيلىككە سىنشىل ساياساتتانۋ رەتىندە تانىلدى. 2019 جىلعى پرەزيدەنت سايلاۋىندا ۇمىتكەر ءامىرجان قوسانوۆتىڭ كومانداسىندا بولدى. ق.توقايەۆ بيلىككە كەلۋىمەن پرەزيدەنت باستاماشىل بولعان ۇلتتىق قوعامدىق سەنىم كەڭەسىنە ەندى، بۇرىنعى نۇروتان قازىرگى امانات پارتياسىنىڭ ءىس-شارالارى تۋرالى ەكسپەرتتىك پىكىرىن ءبىلدىرىپ ءجۇردى.