قوعامدا «ءوزىمدى تابا الماي ءجۇرمىن، نەگە قابىلەتىم بارىن بىلمەيمىن، وزىمە ۇنايتىن ماماندىقتى تاڭداي الماي كەلەمىن» دەگەن سارىنداعى ساۋالدارعا جاۋاپ ىزدەيتىندەر از ەمەس. ادامنىڭ ءوزىن تاني الماۋىنا كوپتەگەن سىرتقى فاكتورلار اسەر ەتۋى مۇمكىن. مىسالى، اتا-انانىڭ اسەرى، ورتانىڭ نەمەسە ىشكى سەنىمسىزدىكتىڭ سالدارى.

كەز كەلگەن ادامنىڭ مىقتى ءارى ءالسىز تۇستارى بولادى. مۇنى مويىنداپ، ءوزىن دامىتۋدى مىقتى ءارى ءالسىز قابىلەتتەرى قانداي ەكەنىن انىقتاۋدان باستاعىن ابزال.

 مىقتى قابىلەتتىڭ تومەندەگىدەي بەلگىلەرى بار:

• ءسىزدىڭ قابىلەتىڭىز مەن شەبەرلىگىڭىز كوبىنە سەنىمسىزدىكتىڭ تاساسىنا جاسىرىنىپ، باعالانباي قالادى؛
• ءسىز بۇل قاسيەتىڭىزدى ارتىقشىلىق، تالانت دەپ ساناماۋىڭىز مۇمكىن. ءبىراق كەز كەلگەن جاعدايدا بۇل قابىلەتىڭىزدى وتە جەڭىل ءارى ەش قينالماستان پايداعا اسىرا الاسىز؛
• باسقا ادامدارعا بۇل قابىلەتىڭىزدى ءتۇسىندىرۋ، ۇيرەتۋ قيىنعا سوعادى؛
• ءدال وسى قابىلەتىڭىزدى قولدانۋ بارىسىندا ۋاقىتتىڭ قالاي ءوتىپ كەتكەنىن بايقاماي قالاسىز جانە بۇل سىزگە ەنەرگيا بەرەدى؛

ءيا، جوعارىداعى اتالعان بەلگىلەر تۋرالى ويلانىپ كورگەنىڭىز ارتىق بولمايدى. كەيىن كەلەسى قۇرالداردى پايدالانىپ، عىلىمي تۇردە ءوزىڭىزدىڭ مىقتى ءارى ءالسىز تۇستارىڭىزدى انىقتاي الاسىز.

Gallup Clifton Strengths

10 جىلدان بەرى Gallup ينستيتۋتى ءتۇرلى سالالار بويىنشا جۇيەلى تۇردە زەرتتەۋ جۇمىستارىن جۇرگىزىپ كەلەدى. بۇگىنگە دەيىن 2 ملن-عا جۋىق ءارتۇرلى كاسىبي ماماندارمەن سۇحبات جۇرگىزگەن. بۇل زەرتتەۋدىڭ ناتيجەسىندە ماماندار ادام بويىنان تابىلاتىن ەڭ ماڭىزدى 34 قابىلەتتى انىقتاپ، سول بويىنشا تەست دايىنداپ شىعاردى. تەست ارقىلى ومىردە جانە جۇمىس بارىسىندا قانداي قابىلەت قولدانىلاتىنىن تۇسىنەتىن بولاسىز.

بۇل تەستتى ونلاين ورىس نەمەسە اعىلشىن تىلىندە تاپسىرۋعا بولادى. الايدا تەست اقىلى، قۇنى 50 دوللار. Gallup-تەستى شامامەن 40-50 مينۋت ۋاقىتىڭىزدى الادى. كەيىن سىزگە بەرىلگەن سيپاتتاماعا ارنايى سەرتيفيكاتتالعان ماماندار ارقىلى ساراپتاما جاساپ، ومىردە قولدانىسقا ەنگىزە باستايسىز.

JobEQ

JobEQ كومپانياسى موتيۆاسيا مەن ادامنىڭ جەكە قۇندىلىقتارىن انىقتاۋعا كومەكتەسەتىن تەست دايىنداعان. تەستى 2 تۇرگە بولىنەدى:

iWAM تەستى: بۇل – ادامنىڭ جۇمىسقا قاتىستى قارىم-قاتىناسى مەن قانداي كەزدە شابىت الاتىنىن انىقتاۋعا جاردەمدەسەدى. تەست ادامنىڭ كوگنيتيۆتى ويلاۋ قابىلەتتەرىنە قاراي جاساقتالعان. كوگنيتيۆتى ويلاۋ ەستە ساقتاۋ، نازار ءبولۋ، شەشىم قابىلداۋ، ءتۇسىنۋ قابىلەتتەرى كەزىندە كورىنىس تابادى. وسىنداي قابىلەتتەردىڭ 16 كاتەگورياسىنا بايلانىستى وبەكتيۆتى تۇردە ساراپتاما جاسالىپ، ادامنىڭ مىقتى قابىلەتىن انىقتاۋعا كومەكتەسەدى.

VSQ تەستى: بۇل تەست ادامنىڭ جەكە قۇندىلىقتارىن انىقتاۋعا سەپتىگىن تيگىزەدى. سونداي-اق بۇل تەست ارقىلى ادام وزىنە قانداي ورتا كەرەگىن، قانداي ۇجىمدا جۇمىس ىستەي الاتىنىن بىلە الادى.

بۇل تەستتى دە ونلاين تۇردە تاپسىرۋعا بولادى. JobEQ – ورىس تىلىندە قولجەتىمدى تەستتەردىڭ ءبىرى.

Hogan

Hogan تەستى: Hogan كومپانياسى جەكە پسيحولوگيا مەن پسيحودياگنوستيكانى زەرتتەۋمەن اينالىسادى. تاۋەلسىز-ونلاين تەستتەردىڭ ىشىندەگى ىسكەرلىك قابىلەتتەردى انىقتاۋعا كومەكتەسەتىن بىردەن ءبىر قۇرال – Hogan تەستى. شامامەن 600 سۇراقتان تۇراتىن تەست 3 تۇرگە بولىنگەن.

تۇلعالىق (Hogan Personality Inventory). بۇل ءسىزدىڭ مىقتى تۇستارىڭىزدى انىقتاۋمەن قاتار، باسقالاردىڭ ءسىزدى قالاي قابىلدايتىنىن جانە ءوزىڭىزدى قالاي باعالايتىنىڭىز تۋرالى انىقتاپ بەرەدى.

جەكە دامۋ (Hogan Development Survey). سترەستتىك جاعداي كەزىندە ادامنىڭ بويىنان قانداي جاسىرىن قابىلەتتەرى پايدا بولاتىنىن، قانداي كەمشىلىكتەرى كوزگە كورىنەتىنىن انىقتايدى.

موتيۆاسيالىق (Motives، Values and Preferences Inventory). سىزگە شابىت الاتىن ساتتەردىڭ، قۇندىلىقتارىڭىز بەن ىشكى قالاۋلارىڭىزدى ءتىزىمىن جاساقتاپ بەرەدى.

تەستتى ونلاين تۇردە تاپسىرۋ 20 مينۋت ۋاقىتىڭىزدى الادى. ناتيجەسىن اعىلشىن نەمەسە ورىس تىلىندە الۋعا مۇمكىندىك بار.

جەكە كوۋچ نەمەسە ۇستاز

ءقازىر ەلىمىزدە «كوۋچ» ءسوزى ءجيى ايتىلىپ ءجۇر. نەگىزىنە بۇل ءسوز قازاق تىلىندەگى «ۇستاز» سوزىمەن ماعىنالاس. تەست تاپسىرعىڭىز كەلمەسە وزىڭىزگە جول كورسەتەتىن ۇستاز تابۋعا تىرىسىڭىز. ءبىراق بۇل الەۋمەتتىك جەلىدەگى كەز كەلگەن كوۋچ-مامانعا بارىپ، اقىلىنا جۇگىنۋ كەرەك دەگەندى بىلدىرمەيدى. جاقسى ۇستاز تاڭداۋ ءۇشىن دە كوپ ىزدەنىس كەرەگىن ۇمىتپاعان ءجون. ەگەر جانىڭىزعا جاقىن ۇستازىڭىزدى تاپقان بولساڭىز، ءوزىڭىزدى بۇگىنگە دەيىن تولعاندىرىپ كەلگەن ماسەلەلەرمەن ءبولىسىپ، بىرلەسە شەشىم ىزدەيسىز. كەيىن تاڭداعان ۇستازىڭىز بويىڭىزداعى قابىلەتتەرىڭىز بەن كەمشىن تۇستارىڭىزعا اناليز جاساپ، سىزگە جول كورسەتەدى.