بۇگىن Narxoz University جانە SANA Business Academy باستاماسىمەن بيزنەس سالاسىنداعى ماماندار ءۇشىن قازاق تىلىندەگى العاش ماگيستر وقۋ باعدارلاماسى ءوز جۇمىسىن باستادى. اتالمىش باعدارلاما ەلىمىزدە 30 جىل بويى ورىس تىلىندە عانا وتەتىن، ەندى كاسىبي تۇردە بيزنەستى باسقارۋدى مەڭگەرۋ ءۇشىن قازاقشا ءبىلىم الۋعا بولادى. اكادەميالىق كۇنتىزبە بويىنشا وقۋ 1 جىلدى قامتيدى. وقۋ جوسپارىنا سايكەس العاشقى ساباق “Welcome day” تانىستىرۋىنان كەيىن “ىسكەرلىك كوممۋنيكاسيا” پانىمەن جالعاستى. بارلىق پاندەر تولىق مەملەكەتتىك تىلدە وتەدى. ۋنيۆەرسيتەت اكىمشىلىگى بيزنەستەگى باسەكەگە قابىلەتتى جاڭا بۋىندى دايىنداۋ ءۇشىن تاجىريبەلى پراكتيك مامانداردى وقىتۋشىلىق قۇرامعا جينادى.
ماقسات حالىق «SANA» Business Academy ديرەكتورى:
MBA - بۇل بيزنەستى باسقارۋدىڭ ماگيستر دارەجەسى. اكادەميالىق دەڭگەيدە قارجى، ەكونوميكا سالاسىنىڭ باكالاۆردان كەيىنگى ساتىسى قازاق تىلىندە وتەدى، الايدا بيزنەس سالاسى بۇگىنگە دەيىن تەك ورىس تىلىندە ەدى. وسى پروبلەمانى شەشۋ ءۇشىن Narxoz university-مەن بىرىگىپ جاڭا وقۋ باعدارلاماسىن قۇردىق. وسىعان دەيىن كاسىبي بيزنەس وقۋ باعدارلاماسىن باسقا دا ۋنيۆەرسيتەتتەرگە ەنگىزدىك، ال بۇل باستاما جاڭا دەم دەسەك بولادى. «باسشىلارعا ارنالعان ىسكەرلىك باسقارۋ» ءبىلىم بەرۋ باعىتىنا ءتۇسۋ ءۇشىن كەم دەگەندە 3 جىل كاسىپ جۇرگىزىپ، جەكە تاجىريبەڭىز بولۋعا ءتيىس. سونداي-اق مىندەتتى تۇردە باكالاۆريات ديپلومى قاجەت. ءوز كاسىبىن دامىتامىن دەگەن تۇلعالار ءۇشىن ەسىگىمىز اشىق.
EMBA وقۋ باعدارلاماسىندا وقۋ جۇيەسىنە ساي 8 مىندەتتى جانە 4 تاڭداۋ ءپان وتەدى. وقۋ ايىنا 3-4 رەت مودۋلدىك فورماتتا، جۇمىس پروسەسىن ۇزبەي جۇزەگە اسادى. ال ءار توپتا 30 ستۋدەنتتەن بولادى، ءار سالانىڭ بىلگىرى مەن كورەگەنى ءوز تاجىريبەسىن ورتاعا سالادى. ستۋدەنتتەر ءار ءپاندى تولىق مەڭگەرۋ ءۇشىن جەكە تاقىرىپقا توقتالىپ، بيزنەس-كەيس نەمەسە ارنايى تاپسىرما ارقىلى قورىتىندى جاسايدى. العان ءبىلىمدى جۇمىس تاجىريبەسىندە بىردەن قولدانىپ، جوبالاردى ءوز كاسىبىمەن تىعىز بايلانىستىرۋعا مۇمكىندىك بار.
اياتجان احمەتجان ”QAZBILIM GROUP” كومپانياسىنىڭ باسقارما ءتوراعاسى:
مەن ءۇشىن اتالمىش وقۋ باعدارلاماسى كاسىپتى مەڭگەرۋگە ناعىز نىق قادام دەر ەدىم. سەبەبى بۇگىندە ترەندكە اينالعان كاسىپتى مەڭگەرۋگە ءۇشىن وتەتىن ايلىق كۋرستار ءىلىپ الار دۇنيە بەرمەيدى. قىسقا ءبىلىم بەرۋ باعدارلاماسىنان جاقسى ناتيجە كورسەتۋ مۇمكىن ەمەس دەپ ويلايمىن. جارق ەتىپ جانعان دۇنيە، جارق ەتىپ سونەتىنى انىق. ءوزىم ءبىلىم سالاسىمەن بيزنەستى قاتار الىپ جۇرگەندىكتەن اعىلشىن، جۇڭگو تىلىندەگى EMBA باعدارلامارىنا قىزىعاتىنمىن. ال ەندى بۇل باعىت انا تىلىمىزدە دە وتەتىنى مەنى قۋانتادى. كەز كەلگەن ءىستى كاسىبي تۇرعىدا مەڭگەرگەن مەن ءۇشىن دۇرىس. بەيكاسىبي تىرلىكتەن ناتيجە الۋ قيىننىڭ قيىنى. سوندىقتان مەندەگى وي ءار كاسىپكەر ءوز سالاسىن جەتىك مەڭگەرسە ەكەن.
قازاق تىلىندەگى العاشقى Executive MBA باعدارلاماسىنىڭ باستالۋى - ەلىمىزدىڭ بيزنەس سالاسىنداعى ماڭىزدى جاڭالىق. جاڭا وقۋ فورماتى ستراتەگيالىق كوزقاراسى مىقتى، ءار سفەراعا يكەمدى جانە باسەكەگە قابىلەتتى مامانداردى دايارلايدى دەپ سەنەمىز. بۇل باعىت بولاشاقتا ءوز كاسىبىن جۇيەلى تۇردە دامىتقىسى كەلەتىندەر ءۇشىن سەنىمدى ىرگەتاس بولماق.