قازاقستاندىق تاۋار وندىرۋشىلەردىڭ ءبىرىڭعاي ءتىزىلىمى قۇرىلماق
2025 جىلعى 3 مامىردا وتكەن ۇكىمەت وتىرىسىندا ق ر يندۋستريا جانە قۇرىلىس ءمينيسترى ەرسايىن ناعاسپايەۆ وتاندىق تاۋار وندىرۋشىلەردى قولداۋ شارالارىن تانىستىرىپ، قازاقستاندىق تاۋار وندىرۋشىلەردىڭ ءبىرىڭعاي ءتىزىلىمى قۇرىلاتىنىن مالىمدەدى.
ءمينيستردىڭ ايتۋىنشا، بۇل باستاما — بيىلعى زاڭنامالىق جاڭالىقتاردىڭ ءبىرى. جاڭا جۇيە وتاندىق وندىرۋشىلەر مەن ولاردىڭ ونىمدەرى تۋرالى اقپاراتتى قامتيتىن مەملەكەتتىك سيفرلىق بازا بولماق.
"ءتىزىلىمدى ەنگىزۋ ارقىلى جيناقتالعان مالىمەتتەر نەگىزىندە جالعان وندىرۋشىلەردى انىقتاپ، اشىقتىقتى ارتتىرىپ، سىبايلاس جەمقورلىقتى ازايتۋعا جول اشىلادى"، — دەدى مينيستر ەرسايىن ناعاسپايەۆ.
تىزىلىمگە ەنگىزۋ ءتورت كەزەڭمەن جۇزەگە اسادى:
-
ءوتىنىم بەرۋ – اقپاراتتىق جۇيە ارقىلى تاپسىرىلادى، ال دەرەكتەردى وڭدەۋگە رۇقسات ەلەكتروندىق سيفرلىق قولتاڭبا (ەسق) ارقىلى راستالادى؛
-
مالىمەتتەردى تەكسەرۋ – مەملەكەتتىك دەرەكقورلارمەن اۆتوماتتى سايكەستەندىرۋ جۇرگىزىلەدى؛
-
تەحنولوگيالىق تەكسەرىس – وندىرىستىك پروسەستەر مەن وپەراسيالار باعالانىپ، قاجەت بولسا، كاسىپورىن الاڭىندا تەكسەرۋ جۇرگىزىلەدى؛
-
تۇراقتى مونيتورينگ – تىزىلىمگە ەنگەن وندىرۋشىلەرگە توقسان سايىن باقىلاۋ جۇرگىزىلەدى.
پرەمەر-مينيستر ولجاس بەكتەنوۆ تىزىلىمگە قوسىلۋ پروسەسى بارىنشا جەڭىل ءارى اشىق بولاتىنىن اتاپ ءوتتى:
"ادال وندىرۋشىلەر تىزىلىمگە اۆتوماتتى تۇردە ەنەدى. ال جالعان وندىرۋشىلەرگە كىرۋگە جول بەرىلمەيدى. ءوتىنىش بەرۋ – قاراپايىم، ەشقانداي ارتىق قۇجات پەن تەكسەرىس تالاپ ەتىلمەيدى. بارلىق تەكسەرۋ اۆتوماتتاندىرىلعان، ادامي فاكتور ارالاسپايدى"، – دەدى ۇكىمەت باسشىسى.
جاڭا جۇيە قاشان ىسكە قوسىلادى؟
تاۋار وندىرۋشىلەردىڭ ءبىرىڭعاي ءتىزىلىمى 2026 جىلعى 1 قاڭتاردان باستاپ تولىق ىسكە قوسىلادى. مەملەكەتتىك جانە كۆازيمەملەكەتتىك سەكتورلارداعى ساتىپ الۋلاردا تەك وسى تىزىلىمگە ەنگەن وتاندىق وندىرۋشىلەرگە باسىمدىق بەرىلمەك.
