الماتى وبلىسى ىلە اۋدانىنىڭ ءماسليحات دەپۋتاتى نۇرلان بايعازييەۆ تارازدا سوققىعا جىعىلعان وقيعاعا تۋرالى ايتىپ بەردى.

2024 جىلعى 13 مامىر كۇنى تاراز قالاسىنداعى ءدامحانالاردىڭ بىرىندە الماتى وبلىسى ىلە اۋدانى ءماسليحاتىنىڭ دەپۋتاتى نۇرلان بايعازييەۆ اۋىر سوققىعا جىعىلدى. بۇل اقپاراتتى جامبىل وبلىستىق پوليسيا دەپارتامەنتى راستادى.

وقيعا تۋرالى اقپارات 14 مامىردا جاريالاندى. بايعازييەۆ بەت جاراقاتىمەن اۋرۋحاناعا جەتكىزىلگەن، الايدا مەديسينالىق مەكەمەدە ەم الۋدان باس تارتقان.

وقيعانىڭ جاي-جاپسارى

تىلشىلەرمەن سويلەسكەن دەپۋتات نۇرلان بايعازييەۆ جۇمىس ساپارىمەن تارازدا جۇرگەنىن ايتتى. ول قالاداعى ءدامحانالاردىڭ بىرىندە زاڭگەر رەتىندە كليەنتتەرىمەن كەزدەسىپ وتىرعان. سول ساتتە ۇيالى تەلەفونىنىڭ قۋاتى تاۋسىلىپ، قۇرىلعىسىن قۋاتتاۋ ءۇشىن جانىنداعى ۇستەلگە — وتباسىمەن وتىرعان ادامداردىڭ جانىنا قويعان.

"سول كەزدە الگى ەر ادام ماعان تەلەفوندى سول جەرگە قويۋعا تىيىم سالدى. اراداعى كەلىسپەۋشىلىك جانجالعا ۇلاسىپ، ول مەنى ۇرىپ جىبەردى. مەن قۇلاعان سوڭ دا سوققىنى جالعاستىردى. بۇل جاعداي مەنىمەن وتىرعان باۋىرجاننىڭ كوز الدىندا بولدى. ول شابۋىلداۋشىنى ارەڭ توقتاتتى جانە پوليسيا شاقىردى. مەن ەسىمنەن تانىپ قالىپپىن. كەيىن ماعان جەردە جاتقانىمدا دا تەپكەنىن ايتتى"، – دەدى دەپۋتات بايعازييەۆ.

دەپۋتاتتىڭ ايتۋىنشا، جانجال ءساتى ونىڭ ۇيالى تەلەفونىنىڭ كامەراسىنا ءتۇسىپ قالعان. قازىرگى ۋاقىتتا بۇل ۆيدەو ماتەريال قۇقىق قورعاۋ ورگاندارىنا تاپسىرىلدى ما — ناقتى مالىمەت جوق.

جامبىل وبلىستىق پوليسيا دەپارتامەنتى قىلمىستىق ءىس قوزعالعانى نەمەسە كۇدىكتىنىڭ كىم ەكەنى جونىندە ازىرگە رەسمي اقپارات تاراتقان جوق.