استانا قالاسىندا وتكەن يمامدار فورۋمى اياسىندا "قۇدايى استا ىسىراپقا جول بەرمەۋ" اتتى قۇجات قابىلداندى. بۇل باستاما – ەلىمىزدەگى ءدىني ءداستۇر مەن ۇلتتىق قۇندىلىقتاردى ۇيلەستىرە وتىرىپ، قاراپايىمدىلىقتى ناسيحاتتاۋ، قازىرگى قوعامدا ءجيى بايقالاتىن ىسىراپ پەن الەۋمەتتىك باسەكەلەستىكتىڭ الدىن الۋعا باعىتتالعان ماڭىزدى قادام.

قۇجاتتا قۇدايى اس بەرۋ ءراسىمىن شاريعات تالاپتارى مەن قازاق حالقىنىڭ داستۇرىمەن ۇيلەستىرىپ وتكىزۋ، ارتىق شىعىنعا جول بەرمەۋ، ىسىراپشىلدىقتى بولدىرماۋ سەكىلدى قاعيدالار ناقتىلانعان.

فورۋم اياسىندا يمامدار قازاقستاندىقتاردى:

• وتباسى قۇندىلىقتارىن ساقتاۋعا، ءدىنىمىز بەن داستۇرىمىزگە ساي ەر مەن ايەلدىڭ ءوز مىندەتتەرىن اتقارۋىنا جانە ۇرپاق تاربيەسىنە ەرەكشە ءمان بەرۋگە؛

• قۇدايى استى قاراپايىم تۇردە، شىنايى ىقىلاسپەن وتكىزۋگە، ارتىقشىلىق پەن ءسان-سالتاناتقا بوي الدىرماۋعا؛

• ءداستۇرلى يسلام قۇندىلىقتارىن دارىپتەۋ ارقىلى ۇلتتىق جانە رۋحاني تۇتاستىقتى نىعايتۋ جولىندا بەلسەندى بولۋعا شاقىردى.

سونداي-اق فورۋم بارىسىندا "قازاق حالقىنىڭ داستۇرىندە جانە يسلام دىنىندە وتباسى قۇندىلىعى" اتتى تۇعىرناما دا قابىلداندى. قۇجاتتا يسلامداعى وتباسىنىڭ ورنى مەن جاۋاپكەرشىلىگى ايقىندالىپ، اتا-انا مەن بالا اراسىنداعى بايلانىستى بەكەمدەۋ، يماندى، تاربيەلى ءارى ءبىلىمدى ۇرپاق قالىپتاستىرۋ – باستى مۇرات رەتىندە بەلگىلەنگەن.